قىتايدا اپتاپ ىستىققا بايلانىستى ەسكەرتۋ جاريالاندى

بەيجىڭ. شينحۋا- قازاقپارات - قىتايدىڭ ۇلتتىق مەتەورولوگيالىق ورتالىعى بەيسەنبى كۇنى ەلدىڭ كوپتەگەن ايماعىندا كۇننىڭ قاتتى ىسۋىنا بايلانىستى بيىلدىققا العاش رەت «قىزعىلت سارى» ەسكەرتۋىن جاريالادى، بۇل - ەكىنشى ورىنداعى جوعارى قاۋىپ دەڭگەيى، دەپ حابارلايدى قازاقپارات شينحۋا اگەنتتىگىنە سىلتەمە جاساپ.

ەلدىڭ مەتەورولوگيالىق ورتالىعى 23-ماۋسىمدا كۇندىز سولتۇستىك قىتاي جانە حۋاڭحى مەن حۋايحى وزەنى بويىنداعى ايماقتاردا اۋا تەمپەراتۋراسى 35 گرادۋستان جوعارى بولاتىنىن حابارلادى.

بولجام بويىنشا، حەبەي مەن شاندۋڭ پروۆينسيالارىنىڭ كەي جەرلەرىندە جانە بەيجىڭ مەن تيانجين قالالارىندا تەمپەراتۋرا 40 گرادۋسقا جەتۋى مۇمكىن.

كەشە ساعات 9:00-دە بەيجىڭدە اۋا تەمپەراتۋراسىنىڭ جوعارى بولۋىنا بايلانىستى «قىزعىلت سارى» ەسكەرتۋى جاريالاندى. بولجام بويىنشا قىتاي استاناسىنىڭ كوپتەگەن اۋداندارىندا اپتاپ ىستىق سەنبىگە دەيىن ساقتالادى.

ايتا كەتسەك، ساعات 8:00 مەن 16:00 ارالىعىندا حەبەي مەن شاندۋڭ، بەيجىڭ جانە تيانجين پروۆينسيالارىنىڭ ءبىر بولىگىندە اۋا تەمپەراتۋراسى 40 گرادۋستان اسقان. وسى ءتورت پروۆينسيا ايماعىندا ورنالاسقان 17 مەملەكەتتىك مەتەورولوگيالىق ستانسيا اۋانىڭ رەكوردتىق جوعارى تەمپەراتۋراسىن تىركەدى. بەيجىڭ مەتەورولوگيالىق قىزمەتىنىڭ حابارلاۋىنشا، قالانىڭ وڭتۇستىگىندەگى نانجياۋ مەتەورولوگيالىق ستانساسىندا ساعات 15:19-دا اۋا تەمپەراتۋراسى 41,1 گرادۋس بولعان.

قىتايدا جوعارى تەمپەراتۋراعا بايلانىستى ءۇش دەڭگەيلى ەسكەرتۋ جۇيەسى قابىلدانعان: قاۋىپتىلىكتىڭ ەڭ جوعارى دەڭگەيى - قىزىل ءتۇس، ودان كەيىن قىزعىلت سارى جانە سارى ءتۇس.