جاز مەزگىلىندە ادامدار قانداي جۇقپالى اۋرۋلارمەن ءجيى اۋىرادى

الماتى. قازاقپارات - جاز مەزگىلىندە ادامداردا اسقازان- ىشەك جولدارىنىڭ جۇقپالى اۋرۋلارى ءجيى كەزدەسەدى ءارى ولار ادام دەنساۋلىعىنا وتە زيان.

بۇل تۋرالى الماتى قالالىق №36-ەمحانانىڭ ينفەكسيونيست- دارىگەرى بوپەش ءامىرحانوۆا ايتتى، دەپ حابارلايدى قازاقپارات ءتىلشىسى.

دارىگەردىڭ ايتۋىنشا، ينفەكسيا تاماق، سۋ، كىر قول جانە باسقا زاتتار ارقىلى جۇعۋى مۇمكىن.

«كوپ تاراعان اۋرۋلاردىڭ ءبىرى - Salmonella باكتەرياسى قوزدىراتىن سالمونەللەز. اۋرۋ بەلگىلەرى - جۇرەك اينۋى، قۇسۋ، ديارەيا، تەرى جانە كوزدىڭ سارعايۋى. ينفەكسيانىڭ الدىن الۋ ءۇشىن تەك تازا اۋىز سۋ مەن جاڭا پىسكەن، بالعىن تاعامدى پايدالانۋ كەرەك، تاماق ىشەر الدىندا قولدى مۇقيات جۋۋ كەرەك»، - دەيدى دارىگەر.

ونىڭ سوزىنشە، باسقا دا ينفەكسيا تۇرلەرى بار.

مىسالى Escherichia coli تۋدىراتىن ەشەريحيوز. ونىڭ بەلگىلەرى - قاندى ديارەيا، جۇرەك اينۋى، قۇسۋ جانە ءىشتىڭ اۋىرۋى.

ينفەكسيانى بولدىرماۋ ءۇشىن جاقسى پىسكەن ەتتى جەپ، تاماق ىشەر الدىندا قولدى جاقسىلاپ جۋۋ كەرەك.

ديزەنتەريا - Shigella باكتەرياسى تۋدىراتىن ينفەكسيا. بەلگىلەرى: قاندى ديارەيا، جۇرەك اينۋى، قۇسۋ جانە ءىشتىڭ اۋىرۋى.

تىرىسقاق - Vibrio باكتەرياسى تۋدىراتىن ينفەكسيا. بەلگىلەرى: سۇيىق ديارەيا، جۇرەك اينۋى جانە قۇسۋ.

«ينفەكسيانىڭ الدىن الۋ ءۇشىن تازا اۋىز سۋ مەن جاڭا پىسكەن، بالعىن، جاقسى پىسكەن تاعامدى تۇتىنۋ كەرەك، تاماق ىشەر الدىندا قولدى جاقسىلاپ جۋۋ كەرەك. جاقسى گيگيەنا، تازا تاماق پەن سۋ عانا اسقازان- ىشەك ينفەكسيالارىنىڭ الدىن الۋعا كومەكتەسەتىنىن ەستە ۇستاعان ءجون. اۋرۋدىڭ بەلگىلەرى بايقالسا، كەڭەس الىپ، ەم الۋ ءۇشىن دارىگەرگە قارالىڭىز»، - دەپ تۇيىندەدى بوپەش ءامىرحانوۆا.