قازاقستان گەرمانيانى ەنەرگيامەن قامتاماسىز ەتىپ وتىر - شتاينمايەر
14:56, 20 - ماۋسىم 2023
استانا. قازاقپارات - قازاقستان شيكى مۇناي جەتكىزۋ ارقىلى گەرمانيانى ەنەرگيامەن قامتاماسىز ەتىپ وتىر. بۇل تۋرالى اقوردادا مەملەكەت باسشىسى قاسىم- جومارت توقايەۆپەن كەلىسسوزدەردەن كەيىنگى ب ا ق وكىلدەرىنە بىرلەسكەن مالىمدەمە جاساۋ بارىسىندا گەرمانيا پرەزيدەنتى فرانك- ۆالتەر شتاينمايەر ايتتى، دەپ حابارلايدى قازاقپارات ءتىلشىسى.
«سوڭعى ۋاقىتتا قازاقستان فەدەراتيۆتى رەسپۋبليكانىڭ ەنەرگيامەن جابدىقتالۋىن قامتاماسىز ەتۋدە ايتارلىقتاي ۇلەس قوسىپ كەلەدى. اسىرەسە، قازاقستاننىڭ مۇنايدىڭ قوسىمشا كولەمىن جەتكىزۋدى جوسپارلاپ وتىرعانى قۋانتادى. بۇل كەلەشەكتە ەلىمىزدە ورنالاسقان مۇناي وڭدەۋ كاسىپورىندارىنىڭ جۇمىسىن جانداندىرىپ، شىعىس گەرمانيامەن جانار- جاعارمايمەن جابدىقتاۋعا مۇمكىندىك بەرەدى»، - دەدى فرانك- ۆالتەر شتاينمايەر.
سونىمەن قاتار ول قازاقستان تاراپىنا قوسىمشا مۇناي جەتكىزەتىندىگى ءۇشىن ريزاشىلىعىن ءبىلدىردى.
«بۇل ەنەرگەتيكالىق سەكتور ءۇشىن وتە جاقسى جاڭالىق ءارى قوسىمشا مۇناي جەتكىزۋ تۋرالى كەلىسىم جاسالعانى قۋانتادى. سول ءۇشىن قازاقستان تاراپىنا شىن جۇرەكتەن العىسىمدى بىلدىرەمىن»، - دەدى گەرمانيا پرەزيدەنتى.