ارتسپورت باعدارلاماسى بويىنشا سوتتالعاندار جۇمىس ىستەگەن - ءماجىلىس دەپۋتاتى
بۇگىن ءماجىلىستىڭ الەۋمەتتىك- مادەني دامۋ كوميتەتىنىڭ وتىرىسىندا ArtSport باعدارلاماسىن جەتىلدىرۋ ماسەلەلەرى قارالدى.
جيىن بارىسىندا دەپۋتات نارتاي سارسەنعالييەۆ كەلەسى ماسەلەنى كوتەردى.
«ەلىمىزدىڭ 6 وڭىرىندە ArtSport باعدارلاماسى بويىنشا پريتون ۇيىمداستىرعانى ءۇشىن سوتتالعان ادامدار جۇمىس ىستەگەن. ەلىمىز بويىنشا وسى سەكىلدى 20 فاكتى تىركەلدى. بۇرىنعى جەزوكشەلەر مەن سۋتەنەرلەر قالايشا بالالارمەن جۇمىس ىستەدى؟ مەملەكەتتىك ورگاندار قايدا قارادى؟ وسى جايتتان كەيىن بالالارمەن پسيحولوگتار جۇمىس ىستەدى مە؟ بالالارعا ولاردى بۇرىنعى قىلمىسكەرلەر جاتتىقتىرعانىن قالاي تۇسىندىرەمىز؟ - دەگەن ساۋال جولدادى دەپۋتات.
ساۋالعا باس پروكۋراتۋرانىڭ قوعامدىق مۇددەلەردى قورعاۋ قىزمەتىنىڭ اعا پروكۋرورى دۋلات اشىربەكوۆ جاۋاپ بەردى.
«ەلىمىز بويىنشا ۇيعارىمدارمەن 38 اكت شىعارىلدى. مادەنيەت جانە سپورت ءمينيسترىنىڭ ورىنباسارى ءوز ەركىمەن جۇمىستان شىقتى. سونىمەن قاتار اتالعان فاكتىلەر بويىنشا كوميتەت باسشىسى جۇمىستان بوساتىلدى. وڭىرلەرگە كەلسەك، الماتى، شىمكەنت، بقو، شقو، قاراعاندى جانە ماڭعىستاۋ وبلىسى بار. الماتى مەن شىمكەنتتە ولار قازىر جۇمىس ىستەمەيدى، ال باسقا وڭىرلەر بويىنشا اقپارات سۇراتامىز»، - دەيدى ول.