ريددەردە قورىقتان شىققان ورتكە نايزاعاي سەبەپ بولعان

وسكەمەن. قازاقپارات - شىعىس قازاقستان وبلىسى ريددەردەگى قورىقتا شىققان ءورت ءوشىرىلدى، دەپ حابارلايدى قازاقپارات ءتىلشىسى.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 17 -ماۋسىمدا باتىس التاي مەملەكەتتىك تابيعي قورىعى اۋماعىندا، ناقتى ايتقاندا ريددەر قالاسىنان 80 شاقىرىم قاشىقتىقتا، جەتۋى قيىن تاۋلى ءارى ورماندى جەردە ءورت شىققان بولاتىن.

ءورت چەرنۋشكا وزەنى مەن پرياموي بۇلاعى قوسىلاتىن ورماندى القاپتا شىعىپ، سول جەردەگى اعاشتار جانعان.

جالىندى سوندىرۋگە ت ج د- دان، شەكاراشىلار جانە ورمانشىلاردان 58 ادام مەن 9 تەحنيكا جۇمىلدىرىلدى.

ءتىلسىز جاۋدىڭ تارالۋى 18-ماۋسىمدا ساعات 6.45 تە تەجەلدى.

«بۇگىن ساعات 14.00 دە ءورت تولىقتاي ءسوندىرىلدى. قىزىل جالىننىڭ جالپى اۋماعى 6 گەكتاردى قۇرادى»، - دەلىنگەن اقپاراتتا.

الدىن الا بولجام بويىنشا وت تۇتانۋىنا نايزاعاي سەبەپ بولعان.

ەسكە سالساق، وسىعان دەيىن كاتونقاراعاي اۋدانىنداعى ورمان ءورتى تولىقتاي سوندىرىلگەنى حابارلانعان.