شىعىس قازاقستان وبلىسى ورمانشىلارىندا ءورت سوندىرۋگە ارنالعان جابدىقتار مەن بايلانىس قۇرالدارى جوق
بۇل تۋرالى وبلىس اكىمى ەرمەك كوشەربايەۆتىڭ ريددەر مەن چەرەمشانكا ورمان شارۋاشىلىعى قىزمەتكەرلەرىمەن كەزدەسۋى بارىسىندا ايتىلدى.
«وكىنىشكە قاراي، ورمانشىلاردىڭ ماتەريالدىق- تەحنيكالىق قامتاماسىز ەتىلۋى ماسەلەسى وزەكتى بولىپ وتىر. ورمانشىلاردا ءورت سوندىرۋگە ارنالعان جابدىقتار، بايلانىس قۇرالدارى جانە ءورت وشاقتارىن انىقتاۋعا ارنالعان جابدىقتار جوق. ارنايى ديالوگ كەزىندە ورمان شارۋاشىلىعى ماماندارىنىڭ بارلىق ۇسىنىسى نازارعا الىندى. ەندى ءبىز ونى جۇيەلەپ، ۇكىمەتكە جولدايمىز»، - دەيدى ايماق باسشىسى.
ونىڭ ايتۋىنشا، شىعىس قازاقستاندا ەلىمىزدەگى ورمانداردىڭ جارتىسىنان استامى شوعىرلانعان.
«سوندىقتان ءبىرىنشى كەزەكتە ورمان ورتتەرىن انىقتاۋ جانە الدىن الۋ، براكونەرلەرمەن جانە زاڭسىز اعاش كەسەتىندەرمەن كۇرەسۋ، ەڭ باستىسى، اۋىل تۇرعىندارىن ورتتەن قورعاۋ ءۇشىن بارلىعىن جاساۋ قاجەت. سونداي- اق ورمانشى ماماندىعىنىڭ بەدەلىن كوتەرۋ كەرەك»، - دەيدى ەرمەك كوشەربايەۆ.
ەسكە سالساق، بۇگىن شىعىس قازاقستان وبلىسى كاتونقاراعاي اۋدانىندا ورمان ءورتىنىڭ تارالۋى توقتاتىلعان بولاتىن.
اۆتور:
تالعاتجان مۇحامەتبەك ۇلى