تورەعالي ءتورالىنىڭ قارىنداسى اعاسى تۋرالى اقپاراتتىڭ جالعان ەكەنىن ايتتى

استانا. قازاقپارات - بەلگىلى ءانشى تورەعالي ءتورالىنىڭ قارىنداسى دينا ءتورالى كەشە الماتىدا بولعان وقيعاعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

جاعداي بىلاي. كۇنى كەشە جەڭەشەم ەكەۋى اۋەجايعا، قىزىلوردادا كۇتىپ وتىرعان بالا- شاعاسىنا اسىعىپ بارا جاتقان. رولدە ساۋ وتىرعان ادامدى «ماس كۇيىندە ۇستالدى» دەپ جالعان اقپارات تاراتۋعا ەشكىمنىڭ قۇقىعى جوق. حالىقتىڭ كوڭىلىن قازاقستاندا بولىپ جاتقان جاعدايدان باسقا جاققا اۋدارۋ ءۇشىن جاسالاتىن ادەيى نارسەلەردەن، جالا جابۋلاردان شارشادىق، - دەپ جازدى دينا ءتورالى Instagram جەلىسىندە.

سونىمەن بىرگە، ول پوليتسيا قىزمەتكەرلەرىنىڭ باسىندا بايىپپەن سويلەگەن اعاسىن تۇسىنە الماعانىنا قاپالى.

ينتەرنەتكە تاراتقاندا نەگە بۇكىل ۆيدەونىڭ باسى جوق؟ نەگە تەك ۋشىققان جەرى عانا؟ مىقتى سسەناري، جارايسىڭدار، - دەيدى د. ءتورالى.

جازبا اۆتورى اعاسى تۋرالى اقيقاتتى الداعى ۋاقىتتا اقتارا تۇسەتىنىن مالىمدەدى.

وسى ۋاقىتقا دەيىن بۇكىل قازاقستانعا شۋلاعان اعاما قاتىستى جاعدايلاردىڭ ارتىنداعى ناعىز شىندىقتى بىزدەن باسقا ەشكىم بىلمەيدى. شىندىقتىڭ بەتىن عانا ەمەس، تۇبىمەن قوپارىپ تۇرىپ سىزدەرگە ايتايىن دەسەم، ەكىنشى جاعى دا بار. شىندىق ەشقاشان ەشكىمگە جاقپايدى عوي، اسىرەسە بىزدىكىلەرگە. قالعانىن اعام بوستاندىققا شىققاندا جالعاستىرامىن، - دەپ جازدى ءانشىنىڭ قارىنداسى.

ەسكە سالساق، الماتىدا ەسىرتكىگە ماسايعان كولىك جۇرگىزۋشى پوليتسەيلەرگە بوي بەرمەي، وقيعاعا ورنىنان قاشپاق بولعانى حابارلانعان ەدى. پاترۋلدىك پوليتسيا قىزمەتكەرلەرى جۇرگىزۋشىنىڭ ۇستادى جانە مەديتسينالىق ساراپتاما ناتيجەسىندە ونىڭ ەسىرتكىگە ماس ەكەندىگى بەلگىلى بولدى.

الماتى قالالىق سوتىنىڭ مالىمەتىنشە، ەسىرتكىگە ماسايعان كولىك جۇرگىزۋشى اكىمشىلىك جاۋاپقا تارتىلدى. ول 20 تاۋلىككە قاماۋعا الىنىپ، 7 جىلعا كولىك جۇرگىزۋ قۇقىعىنان ايرىلدى. سوت وتىرىسىندا قۇقىق بۇزۋشى ءىس ماتەريالدارىندا باياندالعان فاكتىلەردى راستاپ، وكىنەتىنىن ايتقان.

ايتا كەتسەك، پابليكتەر رەسمي اقپاراتتا «ا. ەسىمدى ازامات» دەپ بەرىلگەن كولىك جۇرگىزۋشىنىڭ تورەعالي ءتورالى (اليحانوۆ - رەد. ) ەكەنىن جاپپاي جازدى.

اۆتور:

ايجان سەرىكجان قىزى