گرۋزيادا ۇستالعان تاراز اكىمىنىڭ ەكس- ورىنباسارى ەلگە ەكستراديتسيالاندى
«گرۋزيانىڭ ادىلەت مينيسترلىگى لاۋازىمدىق قۇزىرەتىن اسىرا پايدالانعانى جانە بيۋدجەتتىڭ 50 ميلليون تەنگەدەن استام قاراجاتىن ىسىراپ قىلعانى ءۇشىن كۇدىكتى دەپ تانىلعان تاراز قالاسى اكىمىنىڭ بۇرىنعى ورىنباسارىن ۇستاپ بەرۋ تۋرالى قازاقستان رەسپۋبليكاسى باس پروكۋراتۋراسىنىڭ سۇراۋ سالۋىن قاناعاتتاندىردى.
كۇدىكتى قىلمىس جاساعاننان كەيىن قىلمىستىق قۋدالاۋ ورگانىنان بوي تاسالادى. سوندىقتان وعان قاتىستى حالىقارالىق ىزدەۋ جاريالانعان بولاتىن.
قابىلدانعان شارالاردىڭ ناتيجەسىندە ىزدەۋدە جۇرگەن كۇدىكتى گرۋزيادا انىقتالىپ، ۇستالدى.
گرۋزيالىق ارىپستەرمەن اراداعى تىعىز قارىم- قاتىناستىڭ ناتيجەسىندە بۇگىن باس پروكۋراتۋرا، سىبايلاس جەمقورلىققا قارسى ءىس- قيمىل اگەنتتىگىنىڭ قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ كومەگىمەن كۇدىكتىنى قىلمىستىق جاۋاپقا تارتۋ ءۇشىن قازاقستانعا جەتكىزدى»، - دەلىنگەن حابارلامادا.
ءمالىم تىلگەندەي، قازىرگى ۋاقىتتا تاراز قالاسى اكىمىنىڭ بۇرىنعى ورىنباسارى استانا قالاسىنىڭ تەرگەۋ يزولياتورىنا قامالعان.
«كورسەتىلگەن قىلمىستاردى جاساعانى ءۇشىن وعان 12 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن»، - دەپ ناقتىلادى باس پروكۋراتۋرادان.
ەسكە سالايىق، تاراز قالاسى اكىمىنىڭ بۇرىنعى ورىنباسارى قايرات سارىتاي حالىقارالىق ىزدەۋگە جاريالانعان بولاتىن. 2021 -جىلدىڭ 15- جەلتوقسانىندا قر سىبايلاس جەمقورلىققا قارسى ءىس- قيمىل اگەنتتىگى ەكس- شەنەۋنىك گرۋزيادا ۇستىلعانىن جانە ونى ەلگە جەتكىزۋ ماسەلەسى شەشىلىپ جاتقانىن ءمالىم ەتتى.