جامبىل وبلىسىنىڭ شارۋالارى ەگىستىك القابىنا درونمەن تىڭايتقىش سەۋىپ ءجۇر

تاراز. قازاقپارات - جامبىل وبلىسى جۋالى اۋدانى كۇرەڭبەل اۋىلىنىڭ تۇرعىنى ساۋلەمبەك كومەكبايەۆ ەگىستىك القابىنا درونمەن تىڭايتقىش سەۋىپ ءجۇر.

اۋىلشارۋاشىلىق ماقساتىندا قولدانىلاتىن قۇرىلعى قىتايدا قۇراستىرىلعان، دەپ حابارلايدى قازاقپارات ءتىلشىسى.

مۇنداي تەحنيكا جامبىل وبلىسىندا العاش رەت قولدانىلىپ وتىر. جاڭا تەحنولوگيا الداعى ۋاقىتتا ءوز ناتيجەسىن بەرىپ جاتسا، وبلىس كولەمىندە ەنگىزىلەدى.

«درونمەن تىڭايتقىش سەبۋ ءادىسىن جۋالى اۋدانىنداعى شارۋاشىلىق پايدالانىپ وتىر. قىتايدا جاسالعان وزىق تەحنولوگيانىڭ نارىقتاعى باعاسى -8-14 ميلليون تەڭگە ارالىعىندا. ءبىر ساعاتتا درونمەن 20 گەكتار جەرگە تىڭايتقىش شاشۋعا بولادى. ونى ارنايى ماماندار كەلىپ ۇيرەتەدى. تيىمدىلىگىنە كوز جەتكىزسەك، وبلىس بويىنشا قولدانىسقا ەنگىزۋگە دايىنبىز»، - دەيدى وبلىستىق اۋىل شارۋاشىلىعى باسقارماسىنىڭ باسشىسى نۇربي جىگىتەكوۆ.

ايتا كەتەيىك، جامبىل وبلىسىنىڭ شارۋالارى بيىل 770,4 مىڭ گەكتارعا اۋىل شارۋاشىلىعى داقىلدارىن وتىرعىزدى.

وتكەن جىلمەن سالىستىرعاندا 14,4 مىڭ گەكتارعا ۇلعايعان ەگىس القابىنىڭ 216,3 مىڭ گەكتارىنا جازدىق ماساقتى ءداندى داقىل، 72,1 مىڭ گەكتارىنا مايلى داقىل، 44,8 مىڭ گەكتارىنا كوكونىس، 18,8 مىڭ گەكتارىنا داندىك جۇگەرى ەكتى.

ال باقشا داقىلدارى 16,9 مىڭ، كارتوپ 11,8 مىڭ، قانت قىزىلشاسى 10,8 مىڭ، ءبىر جىلدىق ءشوپ 27,9 مىڭ جانە كوپجىلدىق ءشوپ 30,8 مىڭ گەكتارعا سەبىلدى.

بۇعان دەيىن جامبىل وبلىسىندا ءتورت تۇلىكتى اسىلداندىرۋ جۇمىستارى باستالاتىنىن حابارلاعان بولاتىنبىز.