ۇلتتىق قوردان بالالارعا جينالعان قاراجات دوللارمەن بەرىلەدى
بۇل تۋرالى ءماجىلىستىڭ جالپى وتىرىسىندا قارجى ۆيتسە-ءمينيسترى داۋرەن تەمىربەكوۆ ايتتى، دەپ حابارلايدى قازاقپارات ءتىلشىسى.
كەيبىر زاڭنامالىق اكتىلەرگە ۇلتتىق قوردان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات ەربولات ساۋرىقوۆ «ۇلتتىق قور - بالالارعا» جوباسى اياسىندا جيناقتالاتىن قاراجاتتىڭ ينفلياتسياسىنا كىم جاۋاپ بەرەتىندىگىن سۇراعان ەدى.
«ينفلياتسيا ماسەلەسى وسى زاڭ جوباسىندا قاراستىرىلعان، ازىرلەنگەن كەزدە قاراستىردىق. ەڭ باستىسى، قاراجات دوللارمەن جيناقتالادى. بالا 18 جاسقا تولعان كەزدە اقشانى دوللارمەن الادى. سوندىقتان قانداي دا ءبىر ينفلياتسيالىق اۋىرتپالىق بولمايدى»، - دەدى قارجى ۆيتسە-ءمينيسترى داۋرەن تەمىربەكوۆ.
ۇلتتىق بانك ءتوراعاسىنىڭ ورىنباسارى ءاليا مولدابەكوۆا دا ۇلتتىق قور قاراجاتى دوللارمەن ساقتالاتىنىن ايتادى.
«ارينە، ا ق ش دوللارىنىڭ ينفلياتسياسى قازاقستان ينفلياتسياسىنان تومەندەۋ. دوللار ينفلياتسياسى 2-4 پايىز ارالىعىندا بولادى. سوندىقتان ۇلتتىق قوردىڭ كىرىستىلىگىن دوللارمەن ەسەپتەيمىز»، - دەدى ول.