جەڭىس قاسىمبەك استانا قوسىمشا جىلۋمەن قالاي قامتاماسىز ەتىلەتىنىن ايتتى
«قالانى قوسىمشا كولەمدە جىلۋمەن قامتاماسىز ەتۋ ءۇشىن وتكەن جىلى ەكى گاز جىلۋ ستانتسياسىنىڭ قۇرىلىسى باستالعان بولاتىن.
ەلوردانى ارالاۋ بارىسىندا «تۇران» جانە «وڭتۇستىك-شىعىس» گاز جىلۋ ستانتسيالارىنىڭ قۇرىلىسىمەن تانىستىم. ولاردىڭ قۋاتى قۇرىلىسى ۇزاققا سوزىلىپ كەتكەن ج ە و-3-تەن اسىپ تۇسەدى»، - دەپ جازدى اكىم Instagram-داعى پاراقشاسىندا.
ايتۋىنشا، اتالعان ەكى گاز جىلۋ ستانتسياسىن بيىلعى جىلىتۋ ماۋسىمىندا كەزەڭ-كەزەڭىمەن ىسكە قوسۋ جوسپارلانىپ وتىر.
«سونىمەن قاتار مەردىگەرگە ج ە و-3 قۇرىلىسىن بيىل اياقتاۋ مىندەتى جۇكتەلدى. وسى شارالاردىڭ ءبارى جىلۋمەن جابدىقتاۋ كولەمىن ەداۋىر ۇلعايتۋعا، سول سياقتى بولاشاقتا قۇرىلىس جۇمىسى جۇرەتىن اۋدانداردى جىلۋمەن قامتۋعا مۇمكىندىك بەرەدى»، - دەيدى قالا باسشىسى.
ايتا كەتەيىك، كەشە ءماجىلىس دەپۋتاتى ەرلان سايروۆ بيىل استانا جىلۋسىز قالۋى مۇمكىن دەگەن بولجام ايتتى.
ءمالىم بولعانداي، «Amanat» پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق كەڭەستىڭ جۇمىس توبى استانا قالاسىنىڭ ج ە و-3 قۇرىلىسىنا پارتيالىق باقىلاۋ جۇرگىزگەن. ونىڭ قۇرامىنا ءماجىلىس دەپۋتاتتارى، باس پروكۋراتۋرانىڭ، استانا اكىمدىگىنىڭ، قارجى مونيتورينگى اگەنتتىگىنىڭ جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى كىردى.
«قوعامدىق باقىلاۋ تۋرالى» زاڭعا سايكەس، ءبىز ەلورداداعى ج ە و-3 قۇرىلىسىنىڭ ساپاسىنا باقىلاۋ جۇرگىزەمىز. نىساننىڭ قۇرىلىسى 2010-جىلدان بەرى جۇرگىزىلىپ كەلە جاتقانىن بىلەمىز، بۇل - ۇزاق پروتسەسس. ادامدار استانادا جىلۋدىڭ جەتىسپەيتىندىگىنە شاعىمدانادى. سوندىقتان، بيىل قالا بەلگىلى ءبىر دارەجەدە جىلۋسىز قالۋى مۇمكىن دەگەن قاۋىپ بار»، - دەگەن بولاتىن كەڭەس ءتوراعاسى، ءماجىلىس دەپۋتاتى ەرلان سايروۆ.