ءاليحان بوكەيحان مەن دىنمۇحامەد قونايەۆتىڭ كەزدەسۋى
ماسكەۋدە تۇراتىن جانە وقيتىن قازاق جاستارى رازگۋليايەۆ زيراتىنا جينالدى. مارقۇممەن قوشتاسۋعا كەلگەن حالىق وتە كوپ. سولاردىڭ اراسىنان شاعىن توپ وقشاۋلاۋ تۇر.
ۇزدىك- سوزدىق كەلۋشىلەر وسى توپقا ادەيىلەپ بۇرىلىپ، قول الىسىپ ءوتىپ جاتتى. كۇن شىتىمىر، ايازى بەت قاريدى. كوپشىلىك اراسىنان سىنا تاۋىپ، مەن دە سول توپقا تاقاي ءتۇستىم.
ماسكەۋدە ۇلكەن قىزمەت اتقاراتىن تۇرار رىسقۇلوۆ پەن نىعىمەت نۇرماقوۆ اعالار كوزىمە وتتاي باسىلدى. ورتادا دەمبەلشە دەنەلى قياق مۇرتىنا اق كىرگەن، شوقشا ساقالى سالالى، جۇدەۋ ءوڭدى اقساقال سول قولىمەن جاستاۋ ايەلدى قولتىعىنان دەمەسە، ونىڭ وڭ جاعىنان تۇرار سۇيەمەلدەپ تۇر ەكەن. اقساقالدىڭ وڭ جاعىنان نىعىمەت ورىن الىپتى. كوبىنە اقساقالعا كۇبىرلەپ سويلەپ تۇرعان دا نىعىمەت ەدى.
انا كىسى وعان باسىن يزەپ قانا جاۋاپ بەرىپ تۇردى. كەلۋشىلەر ەڭ الدىمەن الگى اقساقالدىڭ قولىن ۇستاپ، سودان سوڭ كەزەكپەن كوڭىلدەرىن ءبىلدىرىپ، ءوتىپ بارادى. ورتا جاستاعى ۇلتى ورىس ناسىلدەس جان اقساقالدىڭ قولىن ۇزاق ۇستاپ تۇرىپ، كوڭىل ايتىپ جاتتى.
مەن وسى ءسات ءيىن تىرەسكەن ورتادا جاس شاماسى وزىممەن شامالاس جىگىتتەن «مىنا كىسى كىم؟» دەپ يەك قاقتىم. «تانىمايسىڭ با؟» دەپ تاڭ قالدى:
- اتاقتى ءاليحان بوكەيحان عوي! قاسىنداعىسى قىزى ەليزاۆەتا. مارقۇم سماعۇلدىڭ زايىبى، - دەپ سىبىرلادى».
ديمەكەڭ سماعۇل ءسادۋاقاس ۇلىن جاقسى بىلەتىنىن جانە ەڭ باستىسى - جالعىز دا بولسا اققان جۇلدىزداي وتكەن كۇيەۋ بالاسىنان ايرىلعان التى الاش كوسەمىنە كوڭىل ايتقانىن باياندايدى:
«سماعۇل ءسادۋاقاسوۆتى جاقسى بىلەتىنمىن. قىزى اكەسىنىڭ يىعىنا ءالسىن- ءالسىن باسىن سالىپ، كۇيزەلىپ- اق تۇر. مەن دە ءاليحاننىڭ قولىن الىپ، سودان سوڭ كەزەكپەن كوڭىل ايتتىم. «اللا جارىلقاسىن!» دەپ ءاليحان ماعان باس ءيدى. مىنە، ءاليحاندى العاشقى جانە سوڭعى كورىپ، جۇزدەسۋىم وسىلاي ەستە قالدى، - دەيدى ديمەكەڭ…
Online Qazaqstan