ماسكەۋدە رەسەي قازاقتارىنىڭ قۇرىلتايى ءوتتى
جيىندى اشقان «وتانداستار» قورىنىڭ پرەزيدەنتى ابزال ساپاربەك ۇلى كەزدەسۋدىڭ ماقساتى - كامچاتكادان سانكت- پەتەربۋرگكە دەيىنگى رەسەيدىڭ تۇكپىر- تۇكپىرىندەگى قانداستارىمىزدى ءبىر ۇستەل باسىنا بىرىكتىرۋ ەكەنىن ايتتى.
«ءبىزدىڭ كەزدەسۋىمىزدىڭ ماقساتى مەملەكەتىمىزدىڭ وسى سالاداعى مىندەتتەرىمەن تىعىز بايلانىستى، بۇل - رەسەيدەگى قازاقتاردىڭ بىرلىگىن نىعايتۋ، وتانداستارىمىزبەن ىنتىماقتاستىق، قازاق حالقىنىڭ ءداستۇرى مەن مادەنيەتىن، ءتىلىن ساقتاۋ، ۇرپاقتار ساباقتاستىعىن قامتاماسىز ەتۋ، سونداي- اق ماڭىزدى ماسەلەلەر بويىنشا پىكىر الماسۋ ءۇشىن ديالوگ الاڭىن قۇرۋ»، - دەپ اتاپ ءوتتى قور باسشىسى.
ا. ساپاربەك ۇلى سونداي- اق بيىل قور شەتەلدىك قانداستاردىڭ مەمۋار، اڭگىمە، پروزا، پوەزيا جانرىنداعى شىعارمالارىن جانە عىلىمي زەرتتەۋلەرىن قازاق جانە ورىس تىلدەرىندە باسىپ شىعارۋدى كوزدەيتىن «ۇلى دالا» جوباسىن ىسكە اسىرۋعا كىرىسكەنىن حابارلادى.
رەسەيدەگى قازاق دياسپوراسى وكىلدەرى دە كوكەيدەگى ويلارىن ورتاعا سالدى.
كوبىسى تىعىز ءوزارا ءىس- قيمىلدى دامىتۋ پەرسپەكتيۆالارىنا، ەتنيكالىق وتاندا وتكىزىلەتىن ءىس- شارالار تۋرالى ۋاقتىلى اقپارات الۋعا، بىرلەسكەن ءبىلىم بەرۋ، تانىمدىق، تۋريستىك جانە وزگە دە جوبالاردى ىسكە قوسۋ مۇمكىندىگىنە، سونداي- اق ۇلتتىق بىرەگەيلىكتى ساقتاۋ ىسىندەگى ءبىرقاتار ماسەلەلەردى شەشۋگە قاتىستى بولدى.
قاتىسۋشىلار جاستاردى قازاقتاردىڭ ۇلتتىق كودىن ساقتاۋ جۇمىسىنا تارتۋ، جينالعان تاجىريبە مەن ءبىلىمدى جاس ۇرپاققا بەرۋ ءۇشىن جاعداي جاساۋ قاجەتتىگىنە ەرەكشە نازار اۋداردى.