بولاشاقپەن ءبىلىم الۋعا بولاتىن فرانسيا جوعارى وقۋ ورىندارىنىڭ ءتىزىمى ارتادى - ساياسات نۇربەك

استانا. قازاقپارات - بۇگىن استانا حالىقارالىق فورۋمى اياسىندا عىلىم جانە جوعارى ءبىلىم مينيسترلىگى مەن حالىقارالىق باعدارلامالار ورتالىعى فرانسيانىڭ قازاقستانداعى ەلشىلىگىمەن مەموراندۋمعا قول قويدى، دەپ حابارلايدى قازاقپارات ءتىلشىسى.

قازاقستان جاستارىنىڭ فرانسۋز ەلىنىڭ جوعارى وقۋ ورىندارىندا ءبىلىم الۋىنا مۇمكىندىك بەرەتىن قۇجاتتى عىلىم جانە جوعارى ءبىلىم ءمينيسترى ساياسات نۇربەك، «حالىقارالىق باعدارلامالار ورتالىعى» ا ق باسقارما ءتوراعاسى ولجاس ساكەنوۆ، فرانسيانىڭ قازاقستانداعى ەلشىسى ديدە كانەسس راسىمدەدى.

«قازاقستان ءۇشىن بۇل نارىقتى جوعالتپاۋىمىز كەرەك. سوندىقتان فرانسيادا بولاشاقپەن ءبىلىم الۋعا بولاتىن جوعارى وقۋ ورىندارىنىڭ ءتىزىمىن كەڭەيتىپ جاتىرمىز. قازىرگى تاڭدا 6 جوعارى وقۋ ورنى بولسا، ەندى ءتىزىمدى 12-15-كە دەيىن ۇلعايتۋىمىز قاجەت. پرەزيدەنتىمىزدىڭ فرانسياعا رەسمي ساپارىندا ۇلكەن كەلىسىمشارتتار راسىمدەلدى. بىزدە فرانسيانىڭ جوعارى ءبىلىم مينيسترلىگىمەن كەلىسىمگە قول قويدىق. وندا «بولاشاق» باعدارلاماسىمەن ءبىلىم الۋ جانە عىلىمي- تەحنيكالىق تاعلىمدامالاردى كۇشەيتۋ كوزدەلگەن. فرانسيا تەحنولوگيالىق تۇرعىدان ەڭ دامىعان ەلدەردىڭ قاتارىنا كىرەدى. بيوتەحنولوگيا، بيومەديتسينا، عارىش، اۋە كولىگى سالاسىنداعى مىقتى زەرتحانالارى بار. ياعني، ەۋروپانىڭ ەڭ مىقتى تەحنولوگيالىق مەملەكەتتەرىنىڭ قاتارىنا كىرەدى. سوندىقتان فرانسۋز زەرتحانالارىمەن جانە جوعارى وقۋ ورىندارىمەن تىعىز بايلانىستى دامىتقىمىز كەلەدى. بيىل قاراشادا ۇلكەن دەلەگاتسيا كەلەدى جانە قازاق- فرانسۋز ءبىرىنشى جوعارى ءبىلىم كونفەرەنسياسىن وتكىزەمىز»، - دەدى مەموراندۋمعا قول قويۋ راسىمىنەن كەيىن ب ا ق وكىلدەرىنە سۇحبات بەرگەن عىلىم جانە جوعارى ءبىلىم ءمينيسترى ساياسات نۇربەك.

ال فرانسيا ەلشىسى ديدە كانەسس اعىلشىن تىلىمەن باسەكەلەس بولا الماسا دا فرانسۋز ءتىلىنىڭ بولاشاعى زور ەكەندىگىن ايتادى.

«فرانسيا ءوزىنىڭ جوعارى وقۋ ورىندارىنىڭ جوعارى دەڭگەيىمەن تانىمال ءارى ماقتان تۇتادى. فرانسيانىڭ تاعى ءبىر باسىمدىلىعى - ءبىلىم الۋدىڭ قولجەتىمدىلىگى. بىزدە فرانسۋز ستۋدەنتتەرى ءۇشىن، سونىمەن قاتار ەۋروپالىق وداق ەلدەرى جاستارى ءۇشىن مەملەكەتتىك جوعارى وقۋ ورىندارىندا تەگىن ءبىلىم بەرۋ ۇستانىمى بار. قالعاندارى وقۋدىڭ ۇشتەن ءبىر بولىگىن تولەيدى. ماسەلەن، ءبىر جىلدىق وقۋعا 3 مىڭ ەۋرو جۇمسالادى. وسى ورايدا فرانسۋز ءتىلى بولاشاق ءتىلى ەكەندىگىن ايرىقشا ايتقىم كەلەدى. ءبىراق، ول اعىلشىن تىلىنە باسەكەلەس بولا المايدى»، - دەدى ەلشى.