قازاقستاندا جىل سوڭىنا دەيىن جاساندى ينتەللەكت ستراتەگياسى جاريالانادى

استانا. قازاقپارات - ەلىمىزدە جىل سوڭىنا دەيىن جاساندى ينتەللەكتى دامىتۋ ستراتەگياسىن جاريالاۋ جوسپارلانىپ وتىر.

بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مالىمدەدى، دەپ حابارلايدى قازاقپارات ءتىلشىسى.

مينيستر ەلىمىزدىڭ يننوۆاتسيالىق ءوسۋ الەۋەتى جوعارى ەكەنىن اتاپ ءوتتى. ايتۋىنشا، عالىمدار مەن جاس تالانتتارعا جاعداي جاسالىپ جاتىر.

«وتكەن جىلى ەكوجۇيە ستارتاپتارى، سيفرلىق قىزمەتتەر مەن تاۋارلاردى ەكسپورتتاۋدى قولداۋ شارالارىنىڭ ارقاسىندا ءتۇسىم 330 ميلليون دوللارعا جەتتى. مەملەكەت باسشىسى اتالعان كورسەتكىشتى 2025 -جىلعا دەيىن كەمىندە 500 ميلليون دوللارعا دەيىن جەتكىزۋدى تاپسىرعان بولاتىن. بۇل باعىتتا ءبىزدىڭ كەلەسى قادام - جاساندى ينتەللەكت. وتانداستارىمىزدىڭ جاساندى ينتەللەكت سالاسىندا ازىرلەگەن ءبىراز جوبالارى بار. ولار الەمدىك قاۋىمداستىقتىڭ نازارىن اۋداردى. جىل سوڭىنا قاراي جاساندى ينتەللەكتى دامىتۋ ستراتەگياسىن تانىستىرامىز»، - دەدى باعدات مۋسين استانا حالىقارالىق فورۋمىندا جاساعان بايانداماسىندا.