الەم ەلدەرىنىڭ ءبىر- بىرىنە سەنىمسىزدىگى جالعاساتىنىنا قاۋىپ بار - جوزە مانۋەل بارروزۋ

استانا. قازاقپارات - الەمدەگى كۇردەلى احۋال الداعى ۋاقىتتا دا جالعاسادى دەگەن قاۋىپ بار. بۇل تۋرالى استانا حالىقارالىق فورۋمىندا ەۋروپالىق كوميسسيانىڭ بۇرىنعى پرەزيدەنتى جوزە مانۋەل بارروزۋ ايتتى، دەپ حابارلايدى قازاقپارات ءتىلشىسى.

كەيىنگى ءبىر جىلداعى الەمدەگى جاعداي بولاشاققا ەلەۋلى تۇردە اسەر ەتىپ وتىر. ياعني ايتارلىقتاي وزگەرىس بايقالدى. وسىعان دەيىن G20 ءسامميتى اياسىندا قارىم- قاتىناس بولدى. سول كەزدە ەۋروپا، قىتاي جانە باسقا دا ەلدەر اراسىنداعى ىنتىماقتاستىق دەڭگەيى ايتارلىقتاي جاقسى بولدى. قازىرگى كەزدە الەمدەگى احۋال مۇلدەم باسقا، - دەدى جوزە مانۋەل بارروزۋ.

ونىڭ ايتۋىنشا، الەم ەلدەرىندە ءبىر- بىرىنە دەگەن سەنىمسىزدىك ارتىپ كەلەدى.

سەنىمسىزدىك دەڭگەيى كۇشەيىپ كەلەدى جانە وسى احۋال الداعى ۋاقىتتا دا جالعاسادى دەگەن قاۋىپ بار. قازىر ءبىز وسى تەندەنتسيانى انىق كورىپ تۇرمىز. مەنىڭ ويىمشا، الەم ەلدەرىندە ءبىر- بىرىنە دەگەن سەنىمسىزدىك الداعى كەزەڭدە قيىنداي تۇسەدى، - دەدى ساراپشى.

بۇدان بۇرىن حابارلانعانداي، بۇگىن ەلورداداعى كونگرەسس ورتالىقتا استانا حالىقارالىق فورۋمى جۇمىسىن باستادى.

فورۋم كليماتتىڭ وزگەرۋىنە، ازىق- تۇلىك تاپشىلىعىنا جانە ەنەرگەتيكالىق قاۋىپسىزدىككە قاتىستى ماسەلەلەردى شەشۋ جولدارىن قاراستىرۋ ماقساتىندا شەتەل ۇكىمەتتەرىنىڭ، حالىقارالىق ۇيىمداردىڭ، بيزنەس پەن عىلىمي ورتانىڭ جوعارى لاۋازىمدى دەلەگاتتارىنىڭ ديالوگىنە ارنالعان الاڭ بولماق.