اكتيۆتەرىن قايدان العانىن راستاي الماعان قازاقستاندىقتار بايلىعىن مەملەكەتكە تاپسىرادى
بۇل تۋرالى ءماجىلىستىڭ جالپى وتىرىسىندا «زاڭسىز الىنعان اكتيۆتەردى مەملەكەتكە قايتارۋ تۋرالى» زاڭ جوباسىن ءبىرىنشى وقىلىمدا تالقىلاۋ كەزىندە ءماجىلىس دەپۋتاتى ەلنۇر بەيسەنبايەۆ ءمالىم ەتتى، دەپ حابارلايدى قازاقپارات ءتىلشىسى.
قۇجاتتا شەت ەلدەردەگى اكتيۆتەردى قايتارۋ بويىنشا جۇمىستى زاڭ اياسىندا جۇرگىزۋ تەتىكتەرى قاراستىرىلعان. زاڭ جوباسىندا اكتيۆتەردى قايتارۋدىڭ ەرىكتى نەمەسە ءماجبۇرلى ءتارتىبى كوزدەلگەن. بىرىنشىدەن، ەرىكتى تۇردە قايتارۋ - وزدەرىنە تيەسىلى مۇلىكتى مەملەكەتكە وتەۋسىز بەرۋ جولىمەن جۇزەگە اسىرىلادى. ەكىنشىدەن، سوتتاردىڭ شەشىمدەرى نەگىزىندە قىلمىستىق پروتسەسس اياسىندا زاڭسىز الىنعان اكتيۆتەردى تاركىلەۋ قاراستىرىلىپ وتىر، - دەدى ە. بەيسەنبايەۆ.
سونىمەن قاتار ول مۇلىكتىڭ قىلمىستىق جولمەن الىنعانى اشىلعان كەزدە، زاڭسىز الىنعان اكتيۆتەردى ماجبۇرلەپ قايتارۋ ەسكەرىلگەنىن ايتتى.
سوتتاردىڭ نەمەسە شەت مەملەكەتتەردىڭ وزگە دە ۋاكىلەتتى ورگاندارىنىڭ شەشىمدەرى نەگىزىندە تاركىلەۋ دە ىسكە اسىرىلادى. جالپى، زاڭ اياسىندا ارنايى كوميسسيا قۇرىلادى، زاڭدى جانە جەكە تۇلعالاردىڭ رەەسترى پايدا بولادى، ارنايى مەملەكەتتىك قور مەن ۋاكىلەتتى ورگان قۇرىلادى، - دەدى دەپۋتات.
زاڭ جوباسىندا ازاماتتىق پروتسەسس اياسىندا تاركىلەۋدىڭ مىناداي الگوريتمى ەسكەرىلگەن:
ءبىرىنشى. ەگەر مونيتورينگ جانە اقپاراتتى تالداۋ قورىتىندىلارى بويىنشا قۇنى 100 ميلليون ا ق ش دوللارىنان اساتىن اكتيۆتى ساتىپ الۋدىڭ زاڭدىلىعىنا بايلانىستى كۇمان بولسا، ۋاكىلەتتى ورگان سۋبەكتىنى جانە ونىڭ ۇلەستەس تۇلعالارىن رەەسترگە ەنگىزۋ ماسەلەسىن كوميسسيانىڭ قاراۋىنا شىعارادى.
ەكىنشى. ماتەريالداردى قاراۋ قورىتىندىلارى بويىنشا كوميسسيا ادامدى رەەسترگە ەنگىزۋ نەمەسە قوسپاۋ تۋرالى ۇسىنىس بەرەدى.
ءۇشىنشى. ۋاكىلەتتى ورگان رەەسترگە ەنگەن ازاماتتارعا ولاردىڭ اكتيۆتەرى تۋرالى دەكلاراتسيانى تاپسىرۋ قۇقىعىنىڭ بار ەكەنىن جەتكىزەدى. دەكلاراتسيالاردى تەكسەرەدى جانە تەكسەرۋ ناتيجەلەرىن كوميسسيانىڭ قاراۋىنا شىعارادى. سونىڭ ناتيجەسىندە، كوميسسيا ودان ءارى شارالار قابىلداۋ تۋرالى ۇسىنىمدار شىعارادى.
ەگەر ادام دەكلاراتسيانى تاپسىرۋ ارقىلى ءوز اكتيۆتەرىن قايدان العانىن راستاي الماسا نەمەسە دەكلاراتسيانى تابىس ەتپەسە، مۇنداي اكتيۆتەر نەگىزسىز بايلىق رەتىندە تانىلىپ، مەملەكەت كىرىسىنە قايتارىلۋى مۇمكىن. ادامداردىڭ قۇقىعىن قورعاۋعا، اشىق پروتسەسكە كەپىلدىك بەرۋ جانە ازاماتتىق قوعام جاعىنان باقىلاۋدى قامتاماسىز ەتۋ ماقساتىندا زاڭ جوباسىندا ءتيىستى قادامدار ەسكەرىلگەن.
بۇل تۇرعىدا ادامداردىڭ جابىق رەەسترى جاسالادى، سەبەبى بۇل باعىتتا رەپۋتاتسيالىق ماسەلەلەر بار. سونىمەن قاتار، اتالعان كوميسسيانىڭ ماسەلەنى القالى تارتىپتە قاراۋى ەسكەرىلگەن. كوميسسياعا دەپۋتاتتار مەن قوعام بەلسەندىلەرى مۇشە بولا الادى. اتاپ ايتقاندا، ادال ساتىپ الۋشىلار مەن ادال كرەديتورلاردىڭ قۇقىقتارى قورعالادى. جالپى، بارلىق ساتىلاردا سوتقا شاعىمدانۋ مۇمكىندىگى بار، سونداي- اق كەلىسىم تالاپتارىن ورىنداعان ادامدار ءۇشىن كەپىلدىكتەر بەرىلەدى، - دەدى ەلنۇر بەيسەنبايەۆ.
بۇدان بۇرىن حابارلانعانداي، زاڭ جوباسى اياسىندا زاڭسىز شىعارىلعان اكتيۆتەردى قايتارۋ جونىندەگى ارنايى ۋاكىلەتتى ورگان مەن كوميسسيا قۇرىلادى، زاڭدى جانە جەكە تۇلعالاردىڭ جابىق رەەسترى جاسالىنىپ، مەملەكەتتىك قور جاساقتالادى.