قازاقستاندا شاحمات مەكتەپ باعدارلاماسىنا ەنگىزىلەدى

الماتى. قازاقپارات - قازاقستاندا شاحماتتى دامىتۋ جول كارتاسى ازىرلەنىپ جاتىر. بۇل تۋرالى الماتى قالاسىنىڭ وڭىرلىك كوممۋنيكاتسيالار قىزمەتى بريفينگىندە قازاقستان شاحمات فەدەراتسياسىنىڭ اتقارۋشى ديرەكتورى گۇلميرا داۋلەتوۆا ايتتى، دەپ حابارلايدى قازاقپارات ءتىلشىسى.

«ءبىز 2016 -جىلى قازاقستاندا 2-4 سىنىپ وقۋشىلارى اراسىندا شاحماتتى ۇيرەتۋ باعدارلاماسىن باستاعان بولاتىنبىز. الايدا، پاندەميا كەزىندە بۇل جوبامىز ءسال توقتاپ قالعان ەدى. قازىرگى تاڭدا بۇل باعدارلامانى قايتا باستاپ جاتىرمىز. ياعني، ءبىز ەندى 1-4 سىنىپتار اراسىندا شاحمات ويناۋدى ۇيرەتەتىن بولامىز. قازىر شاحماتتى دامىتۋ جول كارتاسى دايىندالىپ جاتىر. بيىل قىركۇيەك ايىنان باستاپ 30-عا جۋىق مەكتەپتە باعدارلاما پيلوتتىق جوبا رەتىندە باستالادى»، - دەدى گۇلميرا داۋلەتوۆا.

ونىڭ سوزىنشە، قازاقستاندا بۇگىنگى كۇنى 7 مىڭعا جۋىق شاحمات سەكتسياسى بار.

«بۇل شاحمات سەكسيالارى مەكتەپتەردە ورنالاسقان. قازىرگى تاڭدا قازاقستان دا 200 مىڭنان استام شاحماتشى بار. ولاردىڭ سانى كۇن سايىن ءوسىپ كەلەدى. الماتىدا شامامەن 50 مىڭنان استام شاحماتشى بار. ءبىز بۇل سانداردى مادەنيەت جانە سپورت مينيسترلىگىنىڭ مالىمەتىنە سۇيەنىپ ايتىپ وتىرمىز»، - دەدى ق ش ف اتقارۋشى ديرەكتورى گۇلميرا داۋلەتوۆا.