قارۋلى كۇشتەردىڭ اسكەري قىزمەتشىلەرى اباي وبلىسىنداعى ءورتتى سوندىرۋگە اتسالىسۋدا

استانا. قازاقپارات - وڭىردەگى ورتكە قارسى شارالارعا «شىعىس» وڭىرلىك قولباسشىلىعىنىڭ ەكى جۇزگە جۋىق اسكەري قىزمەتشىسى مەن ارميا اۆياتسياسىنىڭ ەكيپاجدارى جۇمىلدىرىلدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

ت ج م جانە قورعانىس مينيسترلىگى ماماندارىنىڭ جۇمىلا كوتەرگەن ءىس-ارەكەتىنىڭ ارقاسىندا ەلدى مەكەندەرگە تونگەن قاۋىپ جويىلدى، الايدا ورمان القابىنىڭ كۇرەسى ءالى دە جالعاسۋدا. قازىرگى ۋاقىتتا ورتكە ورانعان ورمان اۋدانى 3500 گەكتاردى قۇراپ وتىر.

- بۇگىن استانادان كۇشىمىزگە قوسىمشا تاعى ءبىر تىكۇشاق كەلدى. ءورت اۋدانىندا سىيىمدىلىعى 3,5 توننا «بەمبي» اسپالى سۋ اعىزاتىنى بار ءۇش مي-17 كولىكتىك-جاۋىنگەرلىك تىكۇشاعى تارتىلدى. التى ەكيپاج اۋىسىممەن جۇمىس ىستەۋگە جۇمىلدىرىلدى، - دەدى سەمەي قالاسى اۆياتسيالىق ءبولىمىنىڭ كومانديرى، ءبىرىنشى سىنىپتى ۇشقىش پولكوۆنيك ازامات بازىلوۆ.

جۇمىستى ورىنداۋ بارىسىندا ارميا اۆياتسياسىنىڭ ۇشقىشتارى قىزىل جالىنعا قارسى جالپى كولەمى 200 تونناعا جۋىق سۋ شاشقان.

ينجەنەرلىك بولىمشەلەردىڭ اسكەري قىزمەتشىلەرى ارنايى تەحنيكادا ءورت ءسوندىرۋ ماشينالارىنىڭ ءوتۋى ءۇشىن جول سالۋدا، جەردى جىرتىپ، وتقا توسقاۋىل قويۋدا. ودان بولەك جەكە قۇرام قولداعى بار قۇرالداردىڭ كومەگىمەن ءورت سوندىرۋدە. قازىرگى ۋاقىتتا ولار توعىز شارشى شاقىرىمنان اسا ورمان القابىنىڭ ءورتىن اۋىزدىقتادى.

جەدەل شتابتىڭ باسشىلىعىمەن جۇمىستار تاۋلىك بويى جۇرگىزىلەتىن بولادى.