قازاقستاندىق وقۋشىلار قىرىمعا كەتكەن: وقۋ-اعارتۋ مينيسترلىگى تۇسىنىكتەمە بەردى
ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلى قازاقستاندىق وقۋشىلاردىڭ شەتەلگە ساپارى قالاي قاداعالاناتىنىن سۇرادى. بۇل رەتتە جۋرناليست «روسسوترۋدينستۆو» وكىلدىگىنىڭ باعدارلاماسى بويىنشا وقۋشىلاردىڭ قىرىمعا جاساعان ساپارىن مىسالعا كەلتىردى.
«اتا-انالاردىڭ ءبىلىم بەرۋ ۇيىمىمەن بايلانىسپاي، بالالارىن ءوز بەتىنشە جىبەرگەن. ءبىز كۇن سايىن بالالارمەن بايلانىستامىز. 28- مامىردا ولاردىڭ ورالۋىن اسىعا كۇتەمىز. بۇگىنگى تاڭدا ولاردىڭ ءومىرى مەن دەنساۋلىعى، ەموتسيونالدى جاعدايى جاقسى. ويتكەنى، ولارمەن بىرگە اتا- انالارى بار. وقۋشىلار ءبولىم بويىنشا جيىنتىق باعالاۋ جانە توقساندىق جيىنتىق باعالاۋ ەمتيحاندارىن بەلگىلەنگەن كەستە شەڭبەرىندە تاپسىرا الادى. سوندىقتان بۇل وقۋ پروتسەسىنە جانە قورىتىندى باعا الۋعا اسەر ەتپەيدى»، - دەپ ءتۇسىندىردى بالالاردىڭ قۇقىقتارىن قورعاۋ كوميتەتىنىڭ باسشىسى ناسىجان وسپانوۆا.
سونداي-اق، سپيكەر بالالارمەن قانداي دا ءبىر ساپارعا شىقپاس بۇرىن باراتىن ايماقتى زەرتتەپ، قاۋىپسىزدىك تالاپتارىن قاتاڭ ساقتاۋدى ەسكەرتتى.
«ءبىز بۇل ايماقتاعى جاعدايدىڭ وتە شيەلەنىستى ەكەنىن تۇسىنەمىز. سوندىقتان ءار باعىت تۋرالى ويلانۋ كەرەك. اسىرەسە بالالاردىڭ ساياحاتىنا قاتىستى نەمقۇرايلىق تانىتۋعا بولمايدى. ول بالالار كەلگەننەن كەيىن اتا- انالارىمەن اڭگىمە جۇرگىزەتىن بولامىز»، - دەپ تۇيىندەدى ناسىجان وسپانوۆا.