الماتىدا ەشكىمگە اعا-كوكە ەمەسپىن - ەربولات دوسايەۆ
جەتىسۋ اۋدانىنىڭ تۇرعىندارىمەن كەزدەسۋدە قالا تۇرعىنى دۇكەن جانە كافەسى بار كاسىپكەردىڭ ۇستىنەن شاعىمداندى.
«بوكەيحانوۆ كوشەسىندەگى ءدامحانانىڭ يەسى ءوز اۋماعىن زاڭسىز كەڭەيتىپ جاتىر. كافەنىڭ اۋماعى ءتىپتى تابيعي قورعالاتىن اۋماققا، ياعني ەسەنتاي وزەنىنە دەيىن جەتتى. ول جەردە جازعى كافە سالماقشى. جۇمىستاردى باستاپ كەتتى. ول ءبىزدىڭ ەسكەرتۋلەرگە قۇلاق اسپايدى. ونىڭ سەنگەن مىقتى كوكەسى بار عوي دەيمىن»، - دەدى قالا تۇرعىنى.
ەربولات دوسايەۆ قالادا كىم-كىمنىڭ اعا-كوكەسى ەكەنىن، ولاردىڭ نەمەن اينالىساتىنىن بىلمەيتىنىن ايتتى.
«مەن قالادا كىم-كىمنىڭ اعا-كوكەسى ەكەنىن، ولاردىڭ نەمەن اينالىساتىنىن بىلمەيمىن. مەن ءوزىم قالادا ەشكىمگە دە اعا-كوكە ەمەسپىن جانە اۋدان اكىمدەرىنە دە بىرەۋلەرگە ولاي بولۋعا رۇقسات ەتپەيمىن. ءبىز سىزدەر سەكىلدى قاراپايىم كىسىلەرمىز. ەگەر سوتپەن دالەلدەنبەسە، بىزگە ونداي ماسەلەلەردى استارلاپ ايتۋدىڭ قاجەتى جوق»، - دەدى قالا اكىمى.
الماتى باسشىسى، سونداي-اق اتالعان ماسەلەنى شەشۋ ءۇشىن اۋدان اكىمىنە حاتتامالىق تاپسىرما بەرەتىنىن، ەگەر قالاسا قالا تۇرعىنى ونىڭ جانىندا ەرىپ جۇرۋىنە بولاتىنىن قوسا ايتتى.