التاي كولگىنوۆ كوپبالالى انا مارتەبەسىن ومىرلىك ەتىپ بەكىتۋ ۇسىنىسىنا جاۋاپ بەردى
«جالپى، قولدانىستاعى مودەل بالالارى بار وتباسىن الەۋمەتتىك قولداۋ سالاسىنداعى مەملەكەتتىك ساياساتتىڭ ءتيىمدى ەكەنىن كورسەتەدى. بالا كامەلەتكە تولعان نەمەسە ءبىلىم بەرۋ ۇيىمدارىندا وقۋدى بىتىرگەن كەزدە كوپبالالى وتباسىنا جاردەماقى تولەۋدى جالعاستىرۋ كوپ بالالى وتباسىنا جاردەماقى ەنگىزۋ يدەولوگياسىنا قايشى كەلەدى جانە الەۋمەتتىك تاۋەلدىلىكتىڭ دامۋىنا ىقپال ەتەدى. سونىمەن قاتار بۇل ۇسىنىس كامەلەتكە تولماعان ءبىر-ءۇش بالاسى بار جانە كوپبالالى وتباسى مارتەبەسى جوق وتباسىلارعا قاتىستى الەۋمەتتىك ادىلەتسىزدىككە اكەلەدى. وسىعان بايلانىستى، بالالارى بار وتباسىلاردى قولداۋدىڭ قولدانىستاعى تەتىگىن ساقتاۋ ورىندى دەپ سانايمىز.
سونداي-اق، تابىسى تومەن وتباسىلارعا اتاۋلى الەۋمەتتىك كومەك تاعايىندالادى. بيىلدان باستاپ 1 جاستان 6 جاسقا دەيىنگى از قامتىلعان وتباسىلاردان شىققان بالالارعا 1,5 ايلىق ەسەپتىك كورسەتكىش مولشەرىندە اي سايىنعى قوسىمشا تولەم بەرىلەدى. وسىلايشا، مەملەكەتتىك جاردەماقىلار مەن الەۋمەتتىك تولەمدەردى تولەۋدىڭ قولدانىستاعى تەتىگى الەۋمەتتىك تاۋەكەلدەر تۋىنداعان كەزدە اتاۋلى قولداۋدى ۋاقتىلى كورسەتۋگە باعىتتالعان»، - دەپ جازادى التاي كولگىنوۆ.
ۇكىمەت باسشىسىنىڭ ورىنباسارى بۇل باعىتتاعى شارالار حالىقارالىق ستاندارتقا دا سايكەس ەكەنىن اتاپ وتكەن.
«قازاقستاندا انا مەن بالانى الەۋمەتتىك قولداۋدىڭ تولىققاندى جۇيەسى قالىپتاسقان. بۇل جۇيەنىڭ ىشىندە جۇمىس ىستەيتىن اتا-انالاردىڭ قۇقىعىن قورعايتىن شارالار كەشەنى مەن ازاماتتار ءومىرىنىڭ بۇكىل كەزەڭىن قامتيتىن جەڭىلدىكتەر مەن جاردەماقىلار جۇيەسى كىرەدى. بۇل قالىپتاسقان جۇيە حالىقارالىق ەڭبەك ۇيىمىنىڭ تالاپتارى مەن ەكونوميكالىق ارىپتەستىك جانە دامۋ ۇيمىنىڭ بازالىق ستاندارتتارىنا تولىقتاي ساي كەلەدى»، - دەدى ول دەپۋتاتتىق ساۋالعا جولداعان جاۋابىندا.
سونداي-اق جاۋاپتا ەلىمىزدە بالاسى بار وتباسىنى ءومىردىڭ ءتۇرلى جاعدايىندا قولداۋعا باعىتتالعان ءتۇرلى جاردەماقىلار مەن جەڭىلدىكتەر جولعا قويىلعانى ايتىلعان.
«بيىل مەملەكەتتىك جاردەماقىنىڭ 5 تۇرىنە رەسپۋبليكالىق بيۋجەتتەن، الەۋمەتتىك تولەمنىڭ 2 تۇرىنە الەۋمەتتىك ساقتاندىرۋ قورىنان 1,2 تريلليون تەڭگە ءبولىندى. 1- مامىرداعى جاعداي بويىنشا اتالمىش تولەمدەردى 1,5 ميلليون ادام العان. بۇل بىلتىرعى كورسەتكىشتەن كوپ»، - دەگەن ۆيتسە-پرەمەر 2024-جىلى ۇلتتىق قوردان بالالاردىڭ شوتىنا اقشا اۋدارۋ جوباسى باستالاتىنىن ەسكە سالعان.
«2020-جىلدان باستاپ كوپبالالىقتى ىنتالاندىرۋ جانە ولارعا الەۋمەتتىك قولداۋ كورسەتۋ ءۇشىن وتباسىنداعى بالالاردىڭ سانىنا قاراي سارالانعان مولشەردە مەملەكەتتىك جاردەماقى تولەنىپ كەلەدى (4 بالاسى بار وتباسىلار ءۇشىن جاردەماقى مولشەرى 16,03 ا ە ك - 55304 تەڭگە، 5 بالاسى بار وتباسىلار ءۇشىن 20,04 ا ە ك - 69138 تەڭگە، 6 بالاسى بار وتباسىلار ءۇشىن 24,05 ا ە ك - 82973 تەڭگە، 7 بالامەن 28,06 ا ە ك - 96807 تەڭگە، 8 جانە ودان كوپ بالادان - ءار بالاعا 4 ا ە ك).
ايتا كەتۋ كەرەك، كوپبالالى وتباسى مارتەبەسى ۋاقىتشا بەرىلەدى جانە ۇلكەن بالانىڭ 18 جاسقا تولۋىنا بايلانىستى توقتاتىلادى. ال ول كۇندىزگى بولىمدە وقىعان جاعدايدا 23 جاسقا تولعاننان كەيىن الىنادى»، - دەلىنگەن جاۋاپتا.
ا. كولگىنوۆ مالىمەتى بويىنشا كوپبالالى وتباسىلارعا جاردەماقى تولەۋدىڭ قولدانىستاعى تەتىگى ەنگەننەن بەرى ونى الۋشىلار سانى 2,1 ەسە وسكەن. 2019-جىلى 252,1 مىڭ وتباسى بولسا، 2023-جىلى 540 مىڭ وتباسىنا دەيىن ارتقان.