الماتىداعى اۆتو ح ق و-لاردا ۇزىن-سونار كەزەك نەلىكتەن قالىپتاسىپ جاتىر

الماتى. قازاقپارات - الماتى قالاسى مەن ونىڭ ماڭىنداعى ەلدى مەكەندەردە اۆتودرومداردىڭ از بولۋىنان مامانداندىرىلعان حالىققا قىزمەت كورسەتۋ ورتالىقتارىندا ۇزىن-سونار كەزەك قالىپتاسىپ جاتىر.

بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى فيليالىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

الماتى فيليالىنىڭ مالىمەتىنشە، قالادا ورنالاسقان 10 اۆتومەكتەپتىڭ ءارقايسىسى اي سايىن ورتاشا ەسەپپەن 300-350 كۋرسانتتى دايىنداپ، قالادا ىستەپ تۇرعان 2 اۆتودرومعا ەمتيحانعا جىبەرەدى. بۇل اۆتودرومدار قالانىڭ 2 مامانداندىرىلعان ح ق و-دا ورنالاسقان. سول سەبەپتى وسى اۆتوح ق و-لار الدىندا ۇزىن-سونار كەزەك پايدا بولادى.

«قازىرگى تاڭدا الماتىدا 4 مامانداندىرىلعان ح ق و بار، ونىڭ تەك ەكەۋىندە اۆتودروم جۇمىس ىستەيدى. بۇل اۆتودرومداردا جۇرگىزۋ بويىنشا ەمتيحاندى تاپسىرۋ كەزىندە ادامي فاكتوردى بولدىرماۋ ءۇشىن زاماناۋي ەلەكتروندىق باقىلاۋ جۇيەسى قولدانىلادى. سونىمەن قاتار قازىرگى تاڭدا ەمتيحان تاپسىرۋشىلاردى الدىن الا جازۋ ارقىلى اۆتوح ق و-لارداعى كەزەكتى رەتتەپ وتىرمىز. ايتا كەتەيىك، №1-مامانداندىرىلعان ح ق و اۆتودرومىنا اۆتوماتتاندىرىلعان جاڭا 2 كولىكتى ىسكە قوسقالى وتىرمىز»، - دەدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى ديرەكتورىنىڭ ورىنباسارى اسەم بولاتبەكوۆا.

ەسكە سالساق، مامىر ايىنىڭ باسىنداعى مەرەكە، دەمالىس كۇندەرىنەن سوڭ، قالاداعى بارلىق اۆتو ح ق و-لاردا ۇزىن- سونار كەزەك پايدا بولعان ەدى.

ايتا كەتەيىك، الماتىدا اۆتودرومى بار №1-مامانداندىرىلعان ح ق و الاتاۋ اۋدانى، «سايالى» شاعىناۋدانى، اققاينار كوشەسى، 1-مەكەنجايىندا، №6-مامانداندىرىلعان ح ق و جەتىسۋ اۋدانى، «كەمەل» شاعىناۋدانى، اقسۋات كوشەسى، 118-مەكەنجايىندا ورنالاسقان.