لوندوندا الماتىلىق سۋرەتشىنىڭ كورمەسى ءوتتى
اۆتور ابستراكسيا ستيلىندە سالىنعان سۋرەتتەرىنىڭ جاڭا توپتاماسىن جارىق تاقىرىبىمەن بايلانىستىرعان، دەپ حابارلايدى قازاقپارات ءتىلشىسى.
جارقىراعان شارلار، يمپۋلستىك ەلەكتر اعىندارى، سارى ساۋلەلەر - مۇنىڭ ءبارى ايعانا عاليدىڭ سۋرەتتەرىندە كورىنىس تاپقان. اۆتور ءوز ەڭبەكتەرىندە جارىقپەن شاعىلىسىپ، ءارتۇرلى كەيىپكە ەنگەن زاتتاردى بەينەلەۋگە تىرىسقان.
«كارتينالار مۇلدەم باسقا تىلدە سويلەيدى. كۆانتتىق فيزيكا نەمەسە كوسمولوگيا ءتىلى مە دەرسىڭ»، - دەيدى ساراپشىلار.
ايعانا سۋرەتتەرىنە ۇلتتىق رەڭ بەرىپ، كارتينالارىن «شاڭقوبىز»، «كيىز ءۇي»، «قوسىن» جانە «ورنەك» دەپ اتاعان.
«اۆتوردىڭ ءتول مادەنيەتىنە وتە جاقىن ەكەندىگىن جانە ونى جوعارى باعالايتىنىن انىق اڭعارۋعا بولادى. ول كوپتەگەن جۇمىستارى ارقىلى ۇلى دالادان باستاۋ الاتىن تاڭىرشىلدىك يدەياسىن جەتكىزۋگە تىرىسقان. ءبىراق ونىڭ شىعارماشىلىعىنىڭ دىنگە ەش قاتىسى جوق، ابستراكتىلىق ونەر دەپ باعالار ەدىم»، دەيدى كورمە كۋراتورى، ساراپشى نيكو كوس ەرل.
ايعانا عالي ءوز شىعارماشىلىعىندا كەنەپ پەن قاعازدان باستاپ، توقىما مەن قولاعا دەيىن پايدالانادى. كوپ سالالى سۋرەتشى - الماتى قالاسىنىڭ تۋماسى، اكەسى قازاق، شەشەسى گرۋزين ۇلتىنان. ايعانا الەمنىڭ تۇكپىر-تۇكپىرىندە كورمەلەر وتكىزىپ، تۋىندىلارى ارقىلى حالقىمىزدىڭ باي مادەني مۇراسىن ناسيحاتتاۋمەن كەلەدى. وكىنىشكە قاراي، كورمەنىڭ اشىلۋىنا ايعانا، كەلە المادى.
«مەنىڭشە، كەز-كەلگەن قازاقستاندىق سۋرەتشى ءۇشىن شەتەلدەردە كورمەلەرگە قاتىسىپ، الەمدىك مادەنيەتپەن بىتە قايناسۋ وتە ماڭىزدى. ءبىراق سولاي بولا تۇرا اۆتور ءوز ءۇنىن ساقتاي ءبىلۋ كەرەك. مەنىڭ باقىتىما وراي، جۇمىستارىم زور سۇرانىسقا يە جانە دۇنيەجۇزى بويىنشا جەكە ادامداردىڭ ۇيلەرىنە نەمەسە مۇراجايلارعا قويىلعان»، دەيدى ايعانا عالي.
«ايعانا ۇلى دالادا تۋىپ-ءوستى. مەن الەمنىڭ ول بولىگىن ەشقاشان كورگەن ەمەسپىن. مەنىڭشە، ايعانا، سانالى تۇردە، بالكىم بەيسانالى تۇردە تۋعان جەرىنىڭ مىقتىلىعىن پاش ەتىپ جاتىر. مەن قازاقستانعا بارىپ، ساياحاتتاعىم كەلەدى»، دەيدى كورەرمەندەردىڭ ءبىرى كەيت برەين.
ءبىر ايعا سوزىلعان كورمەنىڭ كەيبىر كارتينالارى ونەر جارمەڭكەلەرىنە قويىلىپ، ساۋداعا شىعارىلادى. الداعى ۋاقىتتا ايعانا عالي امەريكادا جەكە كورمەسىن وتكىزۋدى جوسپارلاپ وتىر. بۇدان بولەك سۋرەتتەرى كىتاپ بولىپ باسىلىپ، وقىرمان نازارىنا ۇسىنىلماق.