دەپۋتات قازاقستاندىقتاردىڭ مۇڭىن جەتكىزدى
ونىڭ سوزىنشە، دەپۋتاتتىق ساۋالىنىڭ ارتىندا ينتەرنەتتىڭ ينەسىنە وتىرماسا دا، عالامتورعا تىرەلگەن تىرشىلىكتەرىن ۋاقىتىندا تىندىرا الماي زارەزاپ بولعان ميلليونداعان قازاقستاندىقتىڭ مۇڭى جاتىر.
«قازاقستاندا ينتەرنەت بار» دەگەن اتى بولماسا بۇكىل الەمدە جىلدام سانالاتىن جەلى ءبىزدىڭ ەلگە كەلگەندە تابانىنا تاس بايلاپ العانداي كورىنەدى. ساندارعا سۇيەنەيىك، ۇستىمىزدەگى جىلدىڭ 1-ساۋىرىندەگى مالىمەتكە سۇيەنسەك، قازاقستانداعى حالقى سانى 200 مىڭنان اساتىن 1432 اۋىل كەڭ جولاقتى موبيلدى ينتەرنەتكە قوسىلماعان. بۇل رەسمي دەرەك، شىنايى جاعدايعا كەلسەك عالامتوردى اتىمەن كورمەگەن ەلدى-مەكەندەر سانى بۇدان الدەنەشە ەسە كوپ بولۋى بەك مۇمكىن.
سەبەبى، 2020 -جىلى مەملەكەت قازاقستان رەسپۋبليكاسى حالقىنىڭ 98,7 پايىزىن ينتەرنەت جەلىسىنە كەڭجولاقتى قولجەتىمدىلىكپەن قامتاماسسىز ەتتى دەگەندى دە ەستىدى ەل، ءبىراق بۇل دەرەكتىڭ دە ارتى ءبىر-اق تۇتام ەكەنىن ۋاقىت وتە اڭعاردىق. باسقاسىن بىلاي قويعاندا باس قالانىڭ ءبىراز جەرىندە ينتەرنەت اۋپىرىمدەپ ارەڭ ىستەيدى. ساپالى ينتەرنەتتى باسقا تۇگىلى باس قالادا قولدانۋ قيىننىڭ قيىنى«، - دەيدى دەپۋتات.
نارتاي ارالباي ۇىلىنىڭ ايتۋىنشا، ينتەرنەتتىڭ سىن كوتەرمەيتىن ساپاسىنا قاراماستان حالىققا قاجەت تالاي قىزمەتتى ەلەكتروندى پورتالدارعا سالىپ تاستادى جاۋاپتى ۆەدومستۆو.
«ينتەرنەتسىز ءومىردىڭ ازابىن قازىر ەڭ الدىمەن ۇستازدار مەن وقۋشىلار تارتىپ وتىر. بۇل پروبلەمانى ۇكىمەت باسشىسىنىڭ ورىنباسارى التاي كولگىنوۆتە راستاپ وتىر. ول ءوز سوزىندە قازىر قازاقستانداعى 3 مىڭنان استام مەكتەپ عالامتورعا قوسىلماعان نەمەسە ونىڭ ساپاسى تومەن دەدى. ال ءبىز كوشپەلى وتىرىس بارىسىندا سولتۇستىك قازاقستان وبلىسىنىڭ اۋىلدارىندا كۇندەلىكتى ۇيلەرىنەن تولتىرۋعا ءماجبۇر ونداعان ۇستازبەن جۇزدەستىك. بۇل تەك 1 وبلىستاعى احۋال.
2023 -جىلدىڭ 4 ايىنىڭ وزىندە قازاقستاندىقتار ساپاسىز ينتەرنەتكە قاتىستى 5 مىڭنان استام ارىز-شاعىم تۇسىرگەن. وسى جەردە زاڭدى ساۋال تۋادى، ساپاسىز ينتەرنەتتى ۇسىنعان وپەراتورلارعا قانداي جازا كەسىلدى؟ قانشا ايىپپۇل سالىندى؟ بۇعان دەيىن بايلانىس وپەراتورلارىنا سالىنعان ايىپپۇلدى ەستىپ كەلدىك، دەمەك بۇل ماسەلەنىڭ شەشىمى ەمەس ەكەنىن تۇسىنەتىن كەز كەلگەن جوق پا؟ جۇرتقا ايىپپۇل ەمەس، ساپالى ينتەرنەتقاجەت ەمەس پە؟»، - دەيدى نارتاي ارالباي ۇلى.
وسى رەتتە دەپۋتات بىرنەشە ۇسىنىس جاسادى.
1. ساپاسىز ينتەرنەت پەن ۇيالى بايلانىسسىز وتىرعان اۋىلدارداعى پروبلەمانى شەشۋ ءۇشىن ۇكىمەت تاراپىنان ارنايى كوميسسيا قۇرۋدى، ونىڭ قۇرامىنا قوعام بەلسەندىلەرىن، سالا ماماندارىن جانە دەپۋتاتتاردى قوسۋدى سۇرايمىن.
2. ءسىزدىڭ مينيسترلىكتىڭ مۇمكىندىكتەرىن پايدالانا وتىرىپ ۇيالى بايلانىس پەن ينتەرنەتى جوق اۋىل-ايماقتاردىڭ ءتىزىمىن اتىن اتاپ تۇرىپ اشىق جاريالاۋ كەرەك.
3. ينتەرنەتسىز وتىرعان اۋىل-ايماقتاردىڭ تۇرعىندارى ءوزى تۇرىپ جاتقان ەلدى- مەكەنگە قاشان، قاي كەزدە عالامتوردىڭ قوسىلاتىنىن ناقتى ءبىلۋى كەرەك. سوندىقتان، مينيسترلىك قوعام الدىندا جاۋاپكەرشىلىك الىپ، قاي جەرگە، قاشان ساپالى ينتەرنەتتىڭ جەتەتىنىن اشىق جاريالاۋى قاجەت.