كوشە تازالايتىن ماماننىڭ مونولوگى: استانانىڭ سۋىقتىعىن ادامداردىڭ جىلى ءسوزى ۇمىتتىرادى
مۇندايدا اكىمدىك «استانادا وتكەن تاۋلىكتە ءبىر ايلىق نورمانىڭ قارى ءتۇستى» دەگەن رەليز تاراتادى. ال باقىتگۇل بايسۇلتانوۆا سياقتى تازالىقشى ماماندار بۇل كەزدە سول نورمادان تىس جاۋعان قارمەن ارپالىسىپ جاتادى. ەلوردانىڭ تازالىعىنا 25 -جىلدان استام ۋاقىت بويى ماڭداي تەرىمەن ۇلەس قوسىپ جۇرگەن قالا تۇرعىنىنىڭ بىزگە ايتقاندارىن ىقشامداپ، ماماننىڭ مونولوگى رەتىندە ۇسىنىپ وتىرمىز.
باقتىگۇل بايسۇلتانوۆا، «استانا تازالىق» ج ش س جۇمىسشىسى:
«نورمادان ارتىق تۇسكەن قاردىڭ اۋىرتپالىعىن العاش بولىپ ءبىز سەزىنەمىز»
جالپى قالا تازالىعىنا اتسالىسىپ جۇرگەنىمە 25 جىل بولدى. 2008 -جىلى مەكەمە قايتا قۇرىلىمدالدى دا، سودان بەرى «استانا تازالىق» مەكەمەسىندە جۇمىس ىستەپ كەلەمىن. نەگىزگى ماماندىعىم ماشينيست- حاتشى بولاتىن.
...ءبىزدىڭ جۇمىس تاڭعى 6.00-دەن باستالادى. ساعات 10.00 مەن 12.00 اراسى تۇسكى تاماق ۋاقىتى. ءبىرىنشى كەزەكتىڭ جۇمىس ۋاقىتى ساعات 15.00-گە دەيىن. 16.00-دەن تۇنگى 0.00-گە دەيىن ەكىنشى اۋىسىم جۇمىس ىستەيدى. ال تاۋلىكتەپ قار جاۋعان كۇندەرى كەشكى ساعات 20.00-دەن تاڭعى ساعات 5.00-گە دەيىن قوسىمشا اۋىسىمدار شىعادى. ول ءۇشىن ۇستەمەاقى تولەنەدى.
...تاڭعى ساعات 6.00-دە اساي- مۇيەسىمىزدى الىپ، ايالداماعا كەلەمىز. ويتكەنى تاڭمەن تالاسىپ تۇرعان تۇرعىندار اۆتوبۋسپەن جۇمىسقا، وقۋعا، مەكتەپكە قاتىنايدى. ايالدامانىڭ ماڭايىن تازالاپ، قوقىس جاشىكتەرىن بوساتامىز. ودان كەيىن كولىك تۇراقتارىن سىپىرۋعا بارامىز. ءبىزدىڭ توپقا بەكىتىلگەن ۋچاسكە بوگەنباي باتىر داڭعىلىنان باستاپ «رامستور» ساۋدا ۇيىنە دەيىنگى اۋماقتى الىپ جاتىر.
...جۇمىسىمىز نەگىزىنەن كۇزدە، قىستا اۋىر بولادى. ويتكەنى كۇزدە وتە كوپ جاپىراق تۇسەدى. ال قىستا قارمەن ارپالىسامىز. «استانادا نورمادان بىرنەشە ەسە كوپ قار ءتۇستى» دەگەندى وزدەرىڭىز دە جازىپ جاتاسىزدار عوي. سونىڭ اۋىرتپالىعىن ەڭ ءبىرىنشى سەزىنەتىن - ءبىز.
...وسى قىزمەتتە 25 جىل ەڭبەك ەتكەن ادام رەتىندە ايتسام، قازىر كوشە سىپىراتىن، جول جيەگىن جۋىپ، شاڭ باسىپ كەتكەندە سۋ شاشاتىن ارنايى تەحنيكا بار. ونىڭ ءبارى ءبىزدىڭ جۇمىستى جەڭىلدەتەدى.
...قالا تۇرعىندارى مەن قوناقتارىنا بارىنشا ءتارتىپ ساقتاپ، قوقىس تاستاماي جۇرسە ەكەن دەگەن ءوتىنىشىم بار. ءبىز سياقتى ادامداردىڭ ەڭبەگىن باعالاسا، نۇر ۇستىنە نۇر جاۋار ەدى.
...ايالدامالاردىڭ جانىنداعى قوقىس جاشىگىنە قالدىقتى ءدال تاستاۋعا «ۋاقىتى جەتپەيتىن» تۇرعىندار بارشىلىق. شىرىننىڭ قالدىعى، بالمۇزداقتىڭ تۇقىلى دەگەن سياقتى دۇنيەلەر ايالدامانىڭ ماڭايىن لاستايدى. سول ءۇشىن ارنايى ماشينالار جول جيەگىندەگى توسەنىش تاقتالاردى جۋىپ شىعادى. قالا وزىمىزدىكى عوي. استانامىزدىڭ ادەمى بولعانى، تازا بولعانى وزىمىزگە جاقسى. سول ءۇشىن ونىڭ تازالىعىنا بەي- جاي قاراماسا ەكەن دەيمىن.
«بۇل جۇمىس انامنىڭ كۇتىمىنە قولايلى بولدى»
ءوزىم استانانىڭ بوگەنباي داڭعىلىندا تۇرامىن. تاڭەرتەڭ ءبارىمىزدى قىزمەتتىك اۆتوبۋس جۇمىس ىستەيتىن ۋچاسكەگە تاسيدى. ۇجىمداستارىمنىڭ باسىم بولىگى قالادان تىس اۋىلداردا تۇرادى. ولاردى دا ارنايى اۆتوبۋس اكەلىپ، اۋىسىم بىتكەن سوڭ قايتا اپارىپ تاستايدى.
...ايلىعىمىزدى شامالارىنا قاراي ءوسىرىپ جاتىر. مەيرام سايىن العىسحاتتار مەن كونۆەرتتەر بەرىلەدى. ەكى ۇلىم بار. بىرەۋى ورتالىق سايلاۋ كوميسسياسىندا جۇرگىزۋشى. ەكىنشى ۇلىم مينيسترلىكتەردىڭ بىرىندە سانتەحنيك بولىپ جۇمىس ىستەيدى. ءتورت نەمەرەم بار. تۋعان جەرىم اقمولا وبلىسىنىڭ قاجىمۇقان اۋىلى. شەشەمىز قالاعا كوشكەن كەزدە ءبىز دە ەرىپ كەلدىك. ول كىسى اۋىرىپ قالعاندىقتان، ماماندىعىم بويىنشا جۇمىس ىستەۋ قيىن بولدى. مۇنداعى جۇمىس كەستەسى، ايلىقتى كەشىكتىرمەي بەرەتىنى ماعان قولايلى بولدى دا، وسى سالاعا اۋىسىپ كەتتىم. ايتپەسە 1998 -جىلعا دەيىن ماشينيست-حاتشى بولىپ كوللەدجدە، مەكتەپتە، ساڭىراۋ-مىلقاۋلار قوعامىندا جۇمىس ىستەگەنمىن. مۇندا ايلىقتى ۋاقىتىندا بەرەتىنى ول كەزدە مەن ءۇشىن وتە ماڭىزدى ەدى.
...تويعا بارعاندا، شيپاجايدا ەم العاندا ەلىمىزدىڭ بىرنەشە قالاسىندا بولدىم. قانشا دەگەنمەن استانانىڭ تازالىعى، ادامداردىڭ تازالىققا دەگەن جاۋاپكەرشىلىگى جوعارى سياقتى كورىندى. وعان ءوزىم دە ۇلەس قوسىپ ءجۇرمىن دەپ ويلايمىن.
...ايازدى نەمەسە بوراندى كۇندەرى ۆولونتەرلەر كەلىپ، ىستىق شاي بەرىپ جاتادى. بۇل باسقا ادامدارعا جاي ءبىر كەزەكشى اكسيا سياقتى كورىنگەنىمەن، بىزگە ۇنايدى. قوعامعا كەرەك ادام ەكەنىمىزدى، ەڭبەگىمىز ماڭىزدى ەكەنىن سەزىنىپ قالامىز. جاستار ۇسىناتىن ىستىق شاي بويىمىزدى جىلىتسا، ايتاتىن جىلى سوزدەرى جانىمىزدى جىلىتادى. استانا سۋىق قالا عوي ايتپەسە...