مەكتەپتە اقشا جيناعاندار قوماقتى كولەمدە ايىپپۇل ارقالايدى

استانا. قازاقپارات - مەكتەپتە اقشا جيناعاندار قوماقتى كولەمدە ايىپپۇل ارقالايدى، - دەپ حابارلايدى قازاقپارات.

بۇگىندە ءبىلىم سالاسىنا بولىنەتىن قارجى ءۇش ەسەگە دەيىن ارتقان. بۇل تۋرالى تالدىقورعاندا وتكەن ءبىلىم سالاسىنداعى جەمقورلىقتىڭ الدىن الۋعا ارنالعان جيىندا سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى دميتري مالاحوۆ مالىمدەدى.

«كوررۋپتسياعا قارسى قىزمەت كەيىنگى 3 جىلدا ءبىلىم سالاسىنداعى 300 دەن اسا قىلمىستى تىركەدى. 192 ادام قىلمىستىق جاۋاپكەرشىلىككە تارتىلىپ، 140 ادام سوتتالدى. اگەنتتىك ءتوراعاسى ءبىزدىڭ الدىمىزعا ناقتى مىندەتتەر قويدى. بولىنگەن قارجىنى يگەرۋمەن قوسا جالاقى تولەۋ ماسەلەسى دە ءجىتى تەكسەرىلەدى. كەمشىلىكتەردى جويۋ باعىتىندا بىرلەسكەن شارالار قابىلدانىپ، ەلىمىزدەگى بارلىق ءبىلىم باسقارماسىندا كوررۋپتسيالىق قاۋىپكە تالداۋ جاساۋ جۇمىستارى قولعا الىندى»، - دەيدى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى دميتري مالاحوۆ.

وقۋ-اعارتۋ ءمينيسترى عاني بەيسەمبايەۆ مەكتەپتە بولعان مۇنداي جاعدايلار ءۇشىن ءبىلىم وشاعىنىڭ ديرەكتورى تىكەلەي جاۋاپ بەرەتىنىن ايتتى.

«ءوزىمىز قويدىرا الماعاننان كەيىن بۇل كىسىلەر ەندى مەكتەپتە اقشا جينايتىن بولسا، ول انىقتالاتىن بولسا، 7 ميلليون تەڭگە ايىپپۇل تولەيتىن بولادى. بۇكىل ۇجىمعا ەسكەرتىپ قويىڭىزدار. ءتيىستى قارجى ءبولىنىپ جاتىر. سوندىقتان ەشكىمنەن ەش نارسە جيناۋدىڭ قاجەتى جوق»، - دەدى شەنەۋنىك.

ەسكە سالايىق، بۇعان دەيىن وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتى مەكتەپتەردە قانداي دا ءبىر سىلتاۋمەن جىل سوڭىندا اقشا جيناۋ دەرەكتەرىنە قاتىستى پىكىر بىلدىرگەن بولاتىن.