الماتىدا بەلگىسىز ەر ادام ايەلدى ۇرىپ-سوعىپ كەتتى
15:58, 22 - مامىر 2023
الماتى. قازاقپارات - الماتىدا بەلگىسىز ەر ادام بالالاردىڭ كوزىنشە ايەلدى ۇرىپ-سوقتى. وقيعانىڭ ۆيدەوسى الەۋمەتتىك جەلىگە شىقتى، دەپ حابارلايدى قازاقپارات ءتىلشىسى.
ۆيدەو استىنداعى جازبادا وقيعا اباي داڭعىلى مەن ساين كوشەسىنىڭ قيىلىسى اۋماعىندا بولعانى جازىلعان.
قالالىق پوليتسيا دەپارتامەنتى اۋەزوۆ اۋداندىق پوليتسيا باسقارماسىنا قالا تۇرعىنى شاعىمدانعانىن حابارلادى. جابىرلەنۋشى ايەلدىڭ ايتۋىنشا، 1992-جىلى تۋعان بەيتانىس ادام ونى سەبەپسىز ۇرىپ-سوققان.
«اتالعان دەرەك ق ر ق ك- ءنىڭ 107-بابى 2-بولىگى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. جابىرلەنۋشىنىڭ العان دەنە جاراقاتىنىڭ اۋىرلىعىن انىقتاۋ ماقساتىندا سوت-مەديتسينالىق ساراپتاما تاعايىندالدى»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.