ۇزاق جىل بالا سۇيە الماعان ەرلى-زايىپتىلار «اڭساعان ءسابي» ارقىلى ۇشەمنىڭ اكە-شەشەسى اتاندى
09:07, 16 - مامىر 2023
وسكەمەن. قازاقپارات - وسكەمەن قالاسىندا ۇشەم دۇنيەگە كەلدى، دەپ حابارلايدى قازاقپارات ءتىلشىسى.
«الەۋمەتتىك مەديتسينالىق ساقتاندىرۋ قورى» ش ق و فيليالى باسپا ءسوز قىزمەتىنىڭ مالىمەتىنە سۇيەنسەك، 9 جىل بويى بالا سۇيە الماي جۇرگەن ەرلى-زايىپتى «اڭساعان ءسابي» باعدارلاماسىنىڭ ارقاسىندا ۇشەمنىڭ اكە-شەشەسى اتاندى.
«وسكەمەن قالاسىنىڭ تۇرعىنى جانسايا احماديەۆا اتالعان باعدارلاماعا ءوتىنىم بەرىپ، الەۋمەتتىك مەديتسينالىق ساقتاندىرۋ قورىنان بولىنگەن كۆوتا ەسەبىنەن ە ك ۇ جاساتتى. ءبارى ويداعىداي بولىپ، ايەل ۇشەم تۋدى. ونىڭ ەكەۋى ۇل، بىرەۋى قىز»، - دەلىنگەن اقپاراتتا.
اتا-اناسى بالالارىنا ەرالى، ەراسىل، زەرە دەپ ات قويعان. بۇگىندە ايەل پەرزەنتحانادان شىعۋعا دايىندالۋدا.
«ۇلدارىم قازىردىڭ وزىندە مىنەزدەرىن، ەركەلىكتەرىن كورسەتىپ جاتىر. ال قىزىم ماعان تارتقان سەكىلدى، ۇيقىسى تىنىش، سابىرلى»، - دەيدى جانسايا احماديەۆا.
اۆتور:
تالعاتجان مۇحامەتبەك ۇلى