اۆتو ح ق و-لار الدىنداعى ۇزىن-سونار كەزەككە تۇسىنىك بەرىلدى - ۆيدەو

الماتى. قازاقپارات - «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ الماتى قالالىق فيليالى مامانداندىرىلعان حالىققا قىزمەت كورسەتۋ ورتالىقتارىندا قالىپتاسقان ۇزىن-سونار كەزەككە قاتىستى تۇسىنىك بەردى، دەپ حابارلايدى قازاقپارات ءتىلشىسى.

مامانداندىرىلعان ح ق و-لاردىڭ ءبىرىنىڭ الدىندا كوپ ادامنىڭ جينالعان ۆيدەوسى الەۋمەتتىك جەلىدە تارادى. ۆيدەو اۆتورىنىڭ ايتۋىنشا، كەزەكتە تۇرعاندار اۆتومەكتەپ وقۋشىلارى.

«ازاماتتارعا ارنالعان ۇكىمەت» مەكەمەسىنىڭ الماتى قالالىق فيليالى ۇزاق دەمالىستان كەيىن قالاداعى بارلىق اۆتو ح ق و-دا ازاماتتاردىڭ كوپتەپ جينالعانىن راستادى.

«ماسەلەن، 10-مامىردا تەك №1-مامانداندىرىلعان ح ق و-دا 2 مىڭنان استام مەملەكەتتىك قىزمەت كورسەتىلسە، ەكىنشى دەڭگەيلى بانكتەردىڭ كولىك قۇرالدارىن قايتا تىركەۋگە بەرگەن وتىنىشتەرى ارقىلى 3 مىڭنان استام قىزمەت كورسەتىلدى. سونداي-اق جۇرگىزۋشى كۋالىگىن الۋعا ۇمىتكەرلەر سانى ارتقان. 13-مامىر سەنبى كۇنى دە وسىنداي جاعداي بايقالدى. قازىرگى ۋاقىتتا مامانداندىرىلعان ح ق و-لار شتاتتىق رەجيمدە جۇمىس ىستەپ تۇر. ەشقانداي كەزەك جوق»، - دەپ حابارلادى «ازاماتتارعا ارنالعان ۇكىمەت» مەكەمەسىنىڭ قالالىق فيليالىنان.