رينات زايىتوۆ جىرشى-تەرمەشىلەر وداعىنا جۇيەلى قاراجات پەن عيمارات سۇرادى

استانا. قازاقپارات - ءماجىلىس دەپۋتاتى رينات زايىتوۆ ۇكىمەتتەن ايتىس اقىندارى مەن جىرشى-تەرمەشىلەر وداعىنا عيمارات ءبولۋدى سۇرادى، دەپ حابارلايدى قازاقپارات ءتىلشىسى.

«قازاق حالقى ءۇشىن ايتىس ونەرىنىڭ ورنى ءارقاشان ەرەكشە بولعان. «ءسوز قادىرىڭ - ءوز قادىرىڭ» - دەپ تۇسىنگەن دانا حالىقىمىز ايتىستى تەك قانا ونەر ەمەس، ءبىر رۋلى ەلدىڭ، ءبىر ايماقتىڭ، قالابەردى ءبىرتۇتاس مەملەكەتتىڭ مۇددەسىن قورعايتىن پىكىر-تالاس الاڭى دەپ تانىعان. ەلىمىز تاۋەلسىزدىك العالى ايتىس ونەرى ارى تۇرا مەملەكەت قارجىسىنان ۇيىمداستىرىلاتىن ايتىستار بولماسا، مەملەكەتتەن ماردىمدى قولداۋ كوردى دەپ ايتا المايمىز. ۋاقىت سىناعىنا قاراماستان، ايتىس ونەرى بۇگىنگى كۇنىمىزگە قازاق حالقىنىڭ ماحابباتى مەن دەمەۋىنىڭ ارقاسىندا جوعالىپ كەتپەي جەتتى. جەتىپ قانا قويماي، 2012-جىلدىڭ 1- تامىزىندا «ايتىس اقىندارى مەن جىرشى-تەرمەشىلەردىڭ حالىقارالىق وداعى» رەسپۋبليكالىق قوعامدىق بىرلەستىگى قۇرىلعان ەدى. قازىرگى تاڭدا، وداق مۇشەلىگىندە 250 گە تارتا ايتىسكەر مەن جىرشى، تەرمەشىلەر بار. وداق قۇرىلعاننان بەرى 110 حالىقارالىق جانە رەسپۋبليكالىق، 100 دەن استام وبلىستىق ءارى اۋداندىق ايتىس وتكىزىلدى. 5 رەت رەسپۋبليكالىق جىرشى-تەرمەشىلەر بايقاۋىن جەكە كاسىپكەرلەردىڭ كومەگىمەن ۇيىمداستىرعان بولاتىن»، - دەدى ر. زايىتوۆ ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان ساۋالىندا.

ونىڭ ايتۋىنشا، مۇنداي زور ءىس-شارالاردى جۇزەگە اسىرىپ وتىرعان وداقتىڭ ءالى كۇنگە دەيىن ءبىر تۇراقتى عيماراتى جوق.

«الماتى قالاسىنان قازاقستاننىڭ ايتىس اقىندارى مەن جىرشى-تەرمەشىلەر وداعىنىڭ اتىنا تۇراقتى مەكەنجايى بولىپ بەكىتىلەتىن عيماراتپەن قامتاماسىز ەتۋدى سۇرايمىن. ەكىنشىدەن، مادەنيەت مينيسترلىگى جاعىنان جۇيەلى قارجىلاندىرۋدى قامتاماسىز ەتۋدى قاراستىرۋدى ۇسىنامىن»، - دەدى دەپۋتات.