قاراقات ابدەن بالا اسىراپ الۋداعى جاساندى كەدەرگىلەر تۋرالى ايتتى
بۇل تۋرالى ءماجىلىس دەپۋتاتى قاراقات ابدەن ايتتى، دەپ حابارلايدى قازاقپارات ءتىلشىسى.
«كوپ جاعدايدا بالالار ءۇيىنىڭ جەتەكشىلەرى بالالاردى اسىراپ العىسى كەلەتىندەرگە نەمەسە پاتروناتتىق وتباسىلارعا بەرۋگە نيەت بىلدىرمەيدى. باس پروكۋراتۋرا مەن بالا اسىراپ الۋ جونىندەگى اگەنتتىك جاعىنان جۇرگىزىلگەن تەكسەرىستىڭ ناتيجەسىندە، ءتىپتى بالا اسىراپ الۋعا قارسى جاساندى كەدەرگىلەردى ويلاپ تاپقان جەتەكشىلەر دە انىقتالدى. ويتكەنى ءار بالاعا مەملەكەتتەن اقشا ءبولىنىپ وتىرادى جانە ول از اقشا ەمەس. مىسالى، بالالار ۇيىندەگى ءبىر ءبۇلدىرشىن ءۇشىن مەملەكەتتەن ايىنا 600 مىڭ تەڭگەدەن 1 ميلليون تەڭگەگە دەيىن قاراجات بەرىلەدى. وسى قاراجاتتى بالا اسىراپ العىسى كەلەتىن وتباسىلاردى قولداۋعا باعىتتاساق، بالا ءۇشىن بۇل الدەقايدا پايدالى بولارى انىق»، - دەدى ق. ابدەن ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى التاي كولگىنوۆتىڭ اتىنا جولداعان ساۋالىندا.
دەپۋتات قازىرگى كەزدە جەتىمدەر ءۇيىنىڭ سانى ازايىپ كەلە جاتقانىن، بالالار ۇيىندە 4916 جەتكىنشەك بار ەكەنىن ايتتى.
«وكىلەتتى ورگاندار كاسىبي نەمەسە فوستەرلىك وتباسىلاردى قۇرۋ جوباسىن قولعا العان. بۇل جوبا دا ەلىمىزدەگى بالالار ءۇيىنىڭ سانىن ازايتۋعا باعىتتالعانى بەلگىلى. وسى ورايدا پيلوتتىق فورماتتا ىسكە قوسىلعان بۇل جوبانىڭ قازىرگى جاعدايى قانداي؟
ال بالالار ۇيىنە توقتالساق، ولاردىڭ جۇمىس باعىتىن وزگەرتۋ كەرەك دەپ سانايمىن. ارينە، جەتىمدەرگە پانا بولعان بالالار ءۇيىن مۇلدەم جاۋىپ تاستاۋ دۇرىس ەمەس. سەبەبى، اۋىر دەرتكە شالدىققان بالالار بار، ولار كوپ جاعدايدا بالالار ۇيىندە قالىپ جاتادى. دەمەك، بالالار ءۇيىنىڭ جۇمىس جۇيەسىن وسىنداي بۇلدىرشىندەرگە كومەك كورسەتەتىن ساۋىقتىرۋ ورتالىعى رەتىندە قايتا قاراستىرعان ءجون. سونداي-اق اسىراپ العان بالالاردى جەتىمدەر ۇيىنە كەرى قايتاراتىن جاعدايلار دا بار، بۇل كورسەتكىش شامامەن 18 پايىزدى قۇرايدى. بۇل جاعدايدى دا ەرەكشە باقىلاۋعا الۋ كەرەك»، - دەدى دەپۋتات.
ونىڭ پايىمىنشا، جەتىم جانە اتا-انا قامقورلىعىنسىز قالعان بالالاردى وتباسىلاردا تاربيەلەۋ ىسىنە باسا نازار اۋدارىپ، ولاردى اسىراپ الۋ بويىنشا جاڭا تەتىكتەردى قاراستىرۋدى جانە فوستەرلىك وتباسى جوباسى تولىققاندى ىسكە قوسىلعانشا، جەتىم بالالارعا ءتيىستى جاعدايدىڭ جاسالۋىنا ىقپال ەتۋدى سۇرادى.