توقايەۆ قازاقستان مەن قىتاي ەكونوميكاسى تۋرالى ايتتى
«ءبىز ەكونوميكالىق ىنتىماقتاستىق سالاسىندا تاماشا ناتيجەلەرگە قول جەتكىزدىك، ءبىراق العا جىلجۋ كەرەك. سوندىقتان قىتاي وركەنيەتىنىڭ بەسىگى سانالاتىن شيان قالاسىنا الداعى ساپارىمدى اسىعا كۇتەمىن. مەنىڭ ويىمشا، بىزگە جاڭا كەلىسىمدەر، جاڭا مامىلەلەر قاجەت، ويتكەنى ءبىر ورىندا تۇرىپ، بەلگىلى ءبىر ناتيجەلەردى كۇتپەۋىمىز كەرەك. ءبىز وسى كۇردەلى الەمدە ەكونوميكالىق بايلانىستارىمىزدى ىلگەرىلەتۋگە كۇش سالۋىمىز كەرەك. مەن ەكى ەلدىڭ جاستارى اراسىنداعى ىنتىماقتاستىق پەن دوستىقتى دامىتۋدى بەرىك ۇستانامىن. جاس ۇرپاق ءبىر- ءبىرىن كوبىرەك ءبىلۋى كەرەك»، - دەدى پرەزيدەنت.
سونداي-اق، قاسىم-جومارت توقايەۆ شي جينپيڭمەن حالىقتاردى جاقىنداستىرۋدىڭ ءوزارا ءتيىمدى ساياساتىن جۇرگىزۋگە كەلىسكەنىن ايتتى.
«قىتاي ءبىزدىڭ سىرتقى ساياساتىمىزدا وتە ماڭىزدى رول اتقارادى. 2019 -جىلعى قىركۇيەكتە مەن قىتايعا مەملەكەتتىك ساپارمەن باردىم. ءتوراعا شي جينپيڭمەن تاماشا كەلىسسوزدەر جۇرگىزدىك. ءبىز حالىقتارىمىزدى جاقىنداستىرۋدىڭ ءوزارا ءتيىمدى ساياساتىن جۇرگىزۋگە كەلىستى. بۇل ەكى ەل اراسىنداعى ستراتەگيالىق ارىپتەستىكتى، ماڭگىلىك دوستىقتى ىلگەرىلەتۋىمىز كەرەك دەگەندى بىلدىرەدى. بۇل كوبىنە قازاق حالقىنىڭ مۇددەسى، ۇزاق مەرزىمدى مۇددەسى دەپ ويلايمىن جانە مەن بۇل ساياساتتى بەرىك ۇستانامىن. جانە، ارينە، ەڭ جاقىن كورشىمىز قىتايمەن ستراتەگيالىق سەرىكتەستىكتىڭ ماڭىزدىلىعىنا ەش كۇمانىمىز جوق»، - دەدى مەملەكەت باسشىسى.
ايتا كەتەيىك، بۇعان دەيىن پرەزيدەنت ق ح ر-عا مەملەكەتتىك ساپارى قارساڭىندا ەلىمىزدىڭ قىتايمەن ساياسي-ەكونوميكالىق جانە مادەني- گۋمانيتارلىق ىنتىماقتاستىعىنىڭ دامۋ پەرسپەكتيۆالارىنا، قازاق- قىتاي قاتىناستارىنىڭ تاريحى مەن بۇگىنگى جاي-كۇيىنە، جاھاندىق جانە وڭىرلىك ساياساتقا قاتىستى Leaders Talk باعدارلاماسىنىڭ سۇراقتارىنا جاۋاپ بەرەتىنى حابارلانعان ەدى.