قازاقستاندا حيميا ونەركاسىبى قالاي دامىپ جاتىر

استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى مارات قارابايەۆ قازاقستانداعى حيميا ونەركاسىبىنىڭ قازىرگى جاعدايى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

ۆەدومستۆو باسشىسىنىڭ ايتۋىنشا، اگروحيمياعا كوپ كوڭىل ءبولىنىپ وتىر.

«حيميا - ايرىقشا نازار اۋدارۋعا تۇرارلىق باعىت. اگروحيمياعا ۇلكەن نازار اۋدارىلادى. وزدەرىڭىز جاقسى بىلەسىزدەر، بىزدە بازالىق اگروحيميالىق ءونىم بار، ياعني امموفوس، سارى فوسفور قازاقستاندا وندىرىلەدى، ونى «قازفوسفات» زاۋىتى شىعارادى. قازاقستان ءوز قاجەتتىلىگىن تولىق جابادى جانە ەكسپورتقا دا شىعادى. ماڭعىستاۋ وبلىسىندا قۋاتى 400 مىڭ تونناعا جەتەتىن «قازازوت» ازوت تىڭايتقىشتارىن وندىرەدى. بىزدە اگروحيميا سالاسىن ەكى نەمەسە ءۇش ەمەس، 10 ەسە ارتتىرۋعا مۇمكىندىك بار»، - دەدى مينيستر استانادا Ondeu Expo يندۋستريالىق كورمەسىندە تىلشىلەرگە بەرگەن سۇحباتىندا.

م. قارابايەۆتىڭ ايتۋىنشا، بۇل ءۇشىن ءبىرقاتار ءىرى جوبالار جۇزەگە اسىرىلۋدا.

«باتىس قازاقستان وبلىسىندا كالي كەن ورىندارى بار. مۇندا نەگىزگى اگروحيميالىق ونىمدەرمەن توقتاپ قالماۋ كەرەك. كۇردەلى مينەرالدى تىڭايتقىشتارعا كوشۋ كەرەك. ول ءۇشىن جامبىل وبلىسىندا «ەۋروحيم» جانە «قازفوسفات» كومپانيالارىنىڭ قاتىسۋىمەن ەكى ءىرى جوبا جۇزەگە اسىپ جاتىر. ولار ءوز قۋاتىن بىرنەشە ەسە ارتتىرۋدى جوسپارلاپ وتىر»، - دەدى مارات قارابايەۆ.