قازاقستاندىق ستۋدەنتتەر گونكونگتە گرانتپەن وقيدى - ساياسات نۇربەك

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك دۇنيەجۇزىلىك ءبىلىم بەرۋ فورۋمى اياسىندا گونكونگتىڭ ءبىلىم ءمينيسترى Christine Choi Yuk-lin-مەن كەزدەسىپ، وسى ماسەلەنى تالقىلاعانىن مالىمدەدى، دەپ حابارلايدى قازاقپارات.

«گونكونگ ۋنيۆەرسيتەتتەرى الەمدەگى ەڭ ۇزدىك وقۋ ورىندارىنىڭ رەيتينگىنە كىرەتىنى بارىمىزگە ءمالىم. بۇگىن مينيستر Christine Choi Yuk-lin-مەن ءبىزدىڭ مينيسترلىك جانە گونكونگتىڭ ءبىلىم مينيسترلىگى اراسىنداعى قول قويىلادى دەپ جوسپارلانعان مەموراندۋمدا كورىنىس تابۋى ءتيىس ماسەلەلەردى تالقىلادىق. سونىڭ ءبىرى - گونكونگ تاراپىنىڭ ءبىزدىڭ ستۋدەنتتەرگە گرانتتار ءبولۋى. قورىتىندى قۇجاتقا وسى جىلدىڭ جازىندا قول قويۋدى جوسپارلاپ وتىرمىز.

سونىمەن قاتار Christine Choi Yuk-lin-گە قازاقستاندىق عالىمداردىڭ گونكونگتە «بولاشاق» باعدارلاماسى شەڭبەرىندە (اسىرەسە «DeepTech» باعىتى بويىنشا زەرتتەۋلەر مەن ازىرلەمەلەر سالاسىندا) تاعىلىمدامادان ءوتۋ ماسەلەسىن قاراۋدى ۇسىندىم»، - دەپ جازدى ۇكىمەت وكىلى.

كەزدەسۋ سوڭىندا مينيسترگە قازاقستاننىڭ جوعارى ءبىلىم بەرۋدى ينتەرناتسيونالداندىرۋ بويىنشا جۇرگىزىلىپ جاتقان جۇمىستارى، ونىڭ ىشىندە جەتەكشى شەتەلدىك جوعارى وقۋ ورىندارىنىڭ فيليالدارىن اشۋ پروتسەسى تۋرالى ايتىلعان.

«وسى تۇرعىدا ارىپتەسىمىزدەن گونكونگ جوعارى وقۋ ورىندارىنىڭ باسشىلىعىنا ءبىزدىڭ وقۋ ورىندارىنىڭ ىنتىماقتاستىقتى كەڭەيتۋگە دايىندىعى، سونداي-اق قوس ديپلومدى باعدارلامالاردى ەنگىزۋ جانە قازاقستاندىق جوعارى وقۋ ورىندارىندا فيليالدار اشۋ تۋرالى اقپاراتتى جەتكىزۋدى سۇرادىم»، - دەيدى ساياسات نۇربەك.