شەتەلدىك ب ا ق- تاعى قازاقستان: مۇناي ەكسپورتىنان تۇسكەن تابىستىڭ ارتۋى
تولىعىراق قازاقپارات ساراپشىسىنىڭ شولۋ ماقالاسىندا.
Reuters:2022 -جىلى قازاقستاننىڭ مۇناي ەكسپورتىنان تۇسكەن تابىسى % 50- عا ءوستى
2-مامىردا Reuters اگەنتتىگى قازاقستاننىڭ ۇلتتىق ستاتيستيكا بيۋروسىنا سىلتەمە جاساپ، ەلىمىزدىڭ مۇناي ەكسپورتىنان تۇسەتىن تابىسى 2022 -جىلى شيكى مۇناي باعاسىنىڭ وسۋىنە بايلانىستى % 50- عا ارتقانىن، دەگەنمەن كولەمى ازايعانىن جازادى.
«ق ۇ س ب مالىمەتتەرى بويىنشا، قازاقستاندىق مۇناي ەكسپورتىنىڭ قۇنى 2021 -جىلى 31 ميلليارد دوللاردى (65,5 ميلليون توننا) قۇراسا، 2022 -جىلى 46,8 ميلليارد دوللارعا (65,0 ميلليون توننا) جەتتى»، - دەلىنگەن ماقالادا.
trend.az:قازاقستان مەن تاجىكستان اۋىل شارۋاشىلىعى سالاسىنداعى ىنتىماقتاستىقتى كەڭەيتۋ تۋرالى قۇجاتقا قول قويدى
Trend.az باسىلىمى 4 -مامىردا جاريالاعان ماقالاسىندا استانادا قازاقستان مەن تاجىكستاننىڭ اۋىل شارۋاشىلىعى مينيسترلىكتەرى اراسىندا ىنتىماقتاستىقتى كەڭەيتۋ جونىندەگى 2023-2025 -جىلدارعا ارنالعان جول كارتاسىنا قول قويىلعانى جونىندە جازادى.
«قۇجاتقا تاجىكستان پرەزيدەنتى ەمومالي راحمون مەن قازاقستان پرەزيدەنتى قاسىم- جومارت توقايەۆتىڭ قاتىسۋىمەن رەسمي دەلەگاتسيا وكىلدەرىنىڭ كەزدەسۋىنەن كەيىن قول قويىلدى. ءسويتىپ پرەزيدەنتتەر تاجىكستاننىڭ اۋىل شارۋاشىلىعى سالاسىنداعى جەتىستىكتەرىن كورسەتۋ ءۇشىن قازاقستاندا تاجىكستان مادەنيەتى كۇندەرىن وتكىزۋگە كەلىستى. سونىمەن قاتار پرەزيدەنتتەر كەزدەسۋىنىڭ نەگىزگى باعىتتارى ساۋدا- ەكونوميكالىق ىنتىماقتاستىقتى نىعايتۋ، ءوزارا تاۋار اينالىمىن ارتتىرۋ، ونەركاسىپ، اۋىل شارۋاشىلىعى، كولىك جانە تسيفرلاندىرۋ سالالارىنداعى ىنتىماقتاستىقتى دامىتۋ بولدى»، دەلىنگەن ماقالادا.
ەسكە سالايىق، 3-4- مامىر كۇندەرى تاجىكستان پرەزيدەنتى ەمومالي راحمون قازاقستانعا مەملەكەتتىك ساپارمەن كەلگەن ەدى.
Azertag.az: پرەزيدەنت يلحام اليەۆ: ازەربايجان ارقىلى قازاقستاندىق مۇناي كولەمىن كوبەيتۋ بويىنشا كەلىسسوزدەر جالعاسىپ جاتىر
3 -مامىردا Azertag.az اگەنتتىگى جاريالاعان ماقالادا ازەربايجان پرەزيدەنتى يلحام اليەۆتىڭ ازەربايجان ارقىلى قازاقستاندىق مۇناي كولەمىن ۇلعايتۋ بويىنشا كەلىسسوزدەر جالعاسىپ جاتقانىن ايتقان پىكىرى بەرىلگەن.
يلحام اليەۆ شۋشادا ADA ۋنيۆەرسيتەتىنىڭ 100 جىلدىعىنا وراي ۇيىمداستىرىلعان «ۇلكەن ەۋرازيانىڭ گەوساياساتىن قالىپتاستىرۋ: وتكەننەن بۇگىنگە جانە بولاشاققا» اتتى 4-حالىقارالىق كونفەرەنتسياسىنا قاتىستى. جيىنعا قاتىسقان ازەربايجان پرەزيدەنتى: «ازەربايجان ارقىلى قازاقستان مۇنايىنىڭ كولەمىن ۇلعايتۋ بويىنشا جوسپارىمىز بار، قازىر كەلىسسوزدەر جۇرگىزىلىپ جاتىر. ءبىزدىڭ قۇبىر ينفراقۇرىلىمىمىزدىڭ مۇنى جاساۋعا مۇمكىندىگى بار»، - دەدى ازەربايجان پرەزيدەنتى.
Anadolu Ajansi: فرانسيا سىرتقى ساۋدا ءمينيسترىنىڭ استاناعا ساپارى ەكىجاقتى ارىپتەستىكتى دامىتۋعا سەپتىگىن تيگىزەدى - قازاقستان پرەزيدەنتى
2 -مامىردا Anadolu Ajans باسىلىمى قازاقستان پرەزيدەنتى قاسىم- جومارت توقايەۆ سەيسەنبىدە فرانسيانىڭ سىرتقى ساۋدا ءمينيسترى وليۆە بەشتتى قابىلداپ، ونىڭ ەلىمىزگە ساپارى استانا مەن پاريجدىڭ ارىپتەستىگىن دامىتۋعا ەلەۋلى سەرپىن بەرەتىنىن ايتتى دەپ جازادى.
«بۇل ساپار كوپتەگەن سالاداعى ءوزارا ءتيىمدى ىنتىماقتاستىعىمىزعا تىڭ سەرپىن بەرەدى دەپ سانايمىن. فرانسيا - ەۋروپاداعى ەڭ باستى سەرىكتەسىمىز. ىنتىماقتاستىعىمىزدى ودان ءارى نىعايتۋعا مۇمكىندىگىمىز مول ەكەنىنە سەنىمدىمىن»، - دەدى قاسىم- جومارت توقايەۆ كەزدەسۋ بارىسىندا»، - دەلىنگەن اگەنتتىك ماقالاسىندا.
The Sydney Morning herald:اۋستراليالىقتار اراسىندا كوپ تانىلماعان ازيانىڭ فۋتۋريستىك قالاسى
مامىر ايىنىڭ 2-سىندە The Sydney Morning Herald باسىلىمىندا سيدنەيلىك ساياحاتشى ءارى جازۋشى بەن گرۋنتۋوتەردىڭ ەلىمىزدىڭ باس قالاسى استانا جايلى جازعان ماقالاسى جاريالاندى. ول ءوز ماقالاسىندا باس قالانىڭ ەرەكشە ساۋلەت ونەرىنە توقتالىپ، «نۇر الەم»، «حان شاتىر»، بەيبىتشىلىك سارايى سەكىلدى بىرەگەي عيماراتتار جايلى اڭگىمەلەيدى.
«الەمنىڭ ەڭ عاجايىپ ساۋلەت ورىندارىنىڭ ءبىرى استانادا ورنالاسقانىن كىم بىلگەن؟ ءوز باسىم ول جاققا بارمايىنشا، بىلگەن جوقپىن. قازاقستان - تاڭعاجايىپ جەر، وندا ادامدى تاڭعالدىرارلىق جەرلەر وتە كوپ»، - دەپ جازادى ساياحاتشى.