كەنتاۋدا جەلمەن ۇشقان مەكتەپ شاتىرىنىڭ بولىگى مۇعالىمنىڭ باسىنا ءتۇستى

تۇركىستان. قازاقپارات - كەنتاۋدا جەلمەن ۇشقان مەكتەپ شاتىرىنىڭ بولىگى مۇعالىمنىڭ باسىنا ءتۇستى، ول اۋرۋحانادا جاتىر، دەپ حابارلايدى قازاقپارات ءتىلشىسى.

قاتتى جەلدەن كەنتاۋ قالاسىنداعى مەكتەپ پەن كوللەدجدىڭ جانە تۇرعىن ۇيلەردىڭ شاتىرى ۇشىپ، حالىقتى ابىگەرگە سالۋدا.

كەشەگى كۇنى قالا ورتالىعىندا ورنالاسقان ى. التىنسارين اتىنداعى №1-مەكتەپتىڭ دە شاتىرى قۇلاپ، اۋلادا كەتىپ بارا جاتقان ۇستازدىڭ باسىنا تۇسكەن بولاتىن. بىردەن اۋرۋحاناعا جەتكىزىلگەن پەداگوگكە العاشقى دارىگەرلىك كومەك كورسەتىلدى. «قازىر ناۋقاستىڭ جاعدايى ورتاشا. باسىنداعى ساماي بولىگىندەگى جاراقات تىگىلدى. تراۆماتولوگيا بولىمىندە ەم الىپ جاتىر»، - دەدى كەنتاۋ قالالىق ورتالىق اۋرۋحاناسىنىڭ باس دارىگەرى اسىلبەك وتەبايەۆ.

ەسكە سالايىق، تۇركىستان وبلىسىندا بىرنەشە كۇننەن بەرى قاتتى جەل سوعىپ، ۇيلەر مەن وزگە دە نىسانداردىڭ شاتىرى ءبۇلىندى، مىڭداعان ابونەنت جارىقسىز قالىپ، ساباقتار ونلاين فورماتقا اۋىستىرىلدى.

كەنتاۋ قالاسىندا مەكتەپ پەن كوللەدج شاتىرى ۇشىپ كەتتى، بارلىق باستاۋىش سىنىپ وقۋشىلارى قاشىقتان ءبىلىم الۋعا كوشىرىلدى.