استانادا بالاباقشا تاربيەشىسى ەرەكشە بالانى ۇرىپ-سوققان
العاش رەت ايەل بيىل قاڭتاردا «بالام-اي» بالاباقشاسىندا ۇلىن ۇرعانىن انىقتاعان. اتالعان فاكتى بويىنشا قىلمىستىق ءىس قوزعالىپ، تەرگەۋ شاراسى جالعاسۋدا. وسى وقيعادان كەيىن ەلوردالىق جۇمىسپەن قامتۋ جانە الەۋمەتتىك قورعاۋ باسقارماسى استانالىق اناعا قالا اكىمدىگىنە قاراستى «نۇرلى جۇرەك» الەۋمەتتىك قىزمەت كورسەتۋ ورتالىعىنا اۋىستىرۋدى ۇسىنعان.
«ءبىز اۋىسۋعا كەلىستىك. ورتالىقتان ورىن دا قاڭتاردا ءبولدى، ءبىراق ءبىز 1-ساۋىردە باردىق. 2,5-اي ۇيدە وتىردىق، پسيحولوگيالىق تۇرعىدان بالامدى باسقا ورتالىققا بەرۋگە دايىن بولمادىم. بولعان جاعداي قيىنعا سوقتى. 2-مامىردا بالام ۇيگە دەنەسى كوگەرىپ، سىزات، جاراقاتپەن كەلدى. سوسىن بەينەباقىلاۋ كامەراسىن قاراۋ ءۇشىن ورتالىققا باردىم»، - دەدى اسەل بالاسىمەن بولعان جايت تۋرالى ايتا كەلە.
«2-مامىرداعى جانە ءساۋىر ايىنىڭ سوڭىنداعى بىرنەشە كۇننىڭ بەينەجازباسىن قاراپ شىقتىم جانە تاربيەشى كومەكشىسىنىڭ بالانى جۇيەلى تۇردە ۇرىپ- سوقانىن ءبىلدىم. بارلىق بەينەجازبادا كومەكشى بالامدى ۇرادى، جۇلقىلايدى. بۇعان دەيىن دە بالامدى ۇرىپ- سوققاننان كەيىن، مەن ويلانباستان 112 گە قوڭىراۋ شالىپ، ارىز جازدىم»، - دەپ تولىقتىردى ول.
استانالىق اسەل - كوپبالالى انا، ونىڭ ءتورت بالاسى بار. اتالعان ورتالىق ۇيگە جاقىن بولعان سوڭ جانە قارجىلىق جاعدايىنا قاراي بالاسىن بەرگەن.
«ەندى ودان ءارى نە ىستەۋ كەرەكتىگىن ويلانىپ وتىرمىن. بالامدى ەرەكشە بالالارعا ارنالعان جەكە ورتالىققا بەرەيىن دەسەم، ول قىمبات. ال تەگىن ورتالىق بىزگە جاقىن ماڭدا جوق. باسقا بالاباقشادا دا وسىنداي جاعدايدىڭ قايتالانباسىنا سەنىم جوق»، - دەيدى ول.
وسى ورايدا اسەل مەملەكەتتىك ورگانداردان بالاباقشالاردا ونلاين قاداعالاي الاتىنداي بەينەباقىلاۋ كامەراسىن ورناتۋدى سۇرايدى.
ەلوردانىڭ پوليتسيا دەپارتامەنتىنىڭ مالىمەتىنشە، 3-مامىردا ساعات 19:48-دە ەلوردا تۇرعىنى 6 جاسار ۇلىنا قالانىڭ وڭالتۋ ورتالىقتارىنىڭ بىرىندە جاسالعان قاتىگەزدىك فاكتىسى بويىنشا ارىز تۇسىرگەن.
«الماتى» اۋداندىق پوليتسيا باسقارماسى قىلمىستىق كودەكستىڭ 140-بابى بويىنشا «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» ايىبىمەن سوتقا دەيىنگى تەرگەپ- تەكسەرۋ باستالدى»، - دەلىنگەن پوليتسيا مالىمەتىندە.
اقپاراتتا ايتىلعانداي، اتالعان فاكتى بويىنشا قاجەتتى ساراپتاما تاعايىندالدى.
«قىلمىستىق-پروتسەستىك كودەكسىنىڭ 201-بابى نەگىزىندە تەرگەۋ مۇددەسىندە سوتقا دەيىنگى تەرگەپ- تەكسەرۋدىڭ وزگە دە دەرەكتەرى جاريا ەتىلۋگە جاتپايدى»، - دەيدى ۆەدومستۆودان.
سونداي-اق، بولعان وقيعاعا قاتىستى ەلوردانىڭ جۇمىسپەن قامتۋ جانە الەۋمەتتىك قورعاۋ باسقارماسى رەسمي تۇسىنىكتەمە بەردى.
«2023 -جىلى 3-مامىردا اتا-انالار بەينەباقىلاۋ كامەرالارىن قاراۋ كەزىندە سانيتار تاراپىنان «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ تاربيەلەنۋشىسىنە دورەكى قارىم- قاتىناس جاساۋ فاكتىسى انىقتالدى. پوليتسيا شاقىرىلىپ، اتالعان فاكتى تىركەلدى. قازىرگى ۋاقىتتا الماتى اۋداندىق پوليتسيا ءبولىمىنىڭ قىزمەتكەرلەرى سوتقا دەيىنگى تەرگەۋ جۇرگىزۋدە.
4-مامىردا مەكەمە ديرەكتورىنىڭ № 02-03/168 بۇيرىعىمەن ق ر ەڭبەك كودەكسىنىڭ 52-بابى 14-تارماعى، 1-تارماعى نەگىزىندە بالاعا قورلىق كورسەتكەن قىزمەتكەرمەن ەڭبەك شارتى بۇزىلدى.
مەكەمەدە بالالارعا قاتىستى زاڭسىز ارەكەتتەرگە جول بەرمەۋ بويىنشا قىزمەتكەرلەرمەن تۇراقتى نەگىزدە اڭگىمەلەر مەن دارىستەر وتكىزىلىپ تۇرادى. جوعارىدا اتالعان قىزمەتكەرگە قىلمىستىق جانە اكىمشىلىك جاۋاپكەرشىلىك تۋرالى بىرنەشە رەت ەسكەرتىلگەن (قولحات بار)»، - دەلىنگەن جۇمىسپەن قامتۋ جانە الەۋمەتتىك قورعاۋ باسقارماسىنىڭ حابارلاماسىندا.
ەسكە سالا كەتسەك، بيىل قاڭتاردا ەلوردادا ەرەكشە بالالاردى ۇرىپ-سوققان استانالىق تاربيەشىنىڭ ۇستىنەن قىلمىستىق ءىس قوزعالعان ەدى.
ىشكى ىستەر مينيسترلىگىنىڭ اقپاراتىنشا، 17-قاڭتاردا پوليتسياعا ەلوردا تۇرعىنى «بالام-اي» بالانى دامىتۋ ورتالىعىندا ونىڭ كامەلەتكە تولماعان ۇلىنا قاتىگەزدىكپەن قاراۋ فاكتىسى بويىنشا جۇگىندى.
كەيىن ەلىمىزدىڭ باس پروكۋرورى بەرىك اسىلوۆ اتالعان وقيعانىڭ ءمان-جايىن انىقتاۋدى ءوز باقىلاۋىنا الاتىنىن ءمالىم ەتتى.