ءتورت ەلدىڭ قۇقىققورعاۋ قىزمەتكەرلەرى سامبودان ءوزارا مىقتىنى انىقتايدى
21:59, 04 - مامىر 2023
الماتى. قازاقپارات - الماتىدا سامبو كۇرەسىنەن حالىقارالىق تۋرنير وتەدى. بۇل تۋرالى وڭىرلىك كوممۋنيكاتسيالار قىزمەتى الاڭىندا «دينامو» دەنە شىنىقتىرۋ-سپورت قوعامى» قوعامدىق بىرلەستىگى ءتوراعاسىنىڭ ءبىرىنشى ورىنباسارى اسقار ومارقۇلوۆ ايتتى، دەپ حابارلايدى قازاقپارات ءتىلشىسى.
جارىس «دينامو-قازاقستان» دەنە شىنىقتىرۋ-سپورت قوعامىنىڭ 100 جىلدىق مەرەيتويىنا جانە گەنەرال رۇستەم قايداروۆتى ەسكە الۋعا ارنالعان.
سپيكەر اتاپ وتكەندەي، تۋرنير ىشكى ىستەر مينيسترلىگى، «گەنەرالدار كەڭەسى» قوعامدىق بىرلەستىگى، «دينامو-قازاقستان» دەنە شىنىقتىرۋ-سپورت قوعامى مەن ق ر سامبو كۇرەسى فەدەراتسياسىنىڭ بىرلەسىپ، ۇيىمداستىرۋىمەن وتەدى.
«تۋرنير بيىل بەسىنشى رەت ۇيىمداستىرىلادى. وعان تاجىكستان، قىرعىزستان، وزبەكستان مەن ەلىمىزدىڭ ءار وڭىرىندەگى قۇقىققورعاۋ ورگاندارىنىڭ سپورتشىلارى قاتىسادى. تۋرنيردە ءبىرىنشى ورىن العان سپورتشىعا «سپورت شەبەرى» اتاعى بەرىلەدى. جارىس 5-7- مامىر كۇندەرى الماتىدا ارميا ورتالىق سپورت كلۋبىنىڭ سپورت كەشەنىندە وتەدى»، - دەدى ا. ومارقۇلوۆ.