جەتىسۋ وبلىسىندا جۇمىسشىلاردىڭ تابىسى مەن سانىن جاسىرۋ فاكتىلەرى كوبەيگەن

تالدىقورعان. قازاقپارات - جەتىسۋ وبلىسىندا اۋىلشارۋاشىلىق سالاسىنداعى جۇمىسشىلاردىڭ تابىسى مەن سانىن جاسىرۋ فاكتىلەرى جيىلەگەن.

ماسەلەن، ستاتيستيكا بويىنشا وڭىردە 19931 شارۋا قوجالىق تىركەلسە، كىرىستەر دەپارتامەنتىندە 19239 بار. قالعان 692 قوجالىق سالىق دەپارتامەنتىنە تىركەلمەگەن، دەپ حابارلايدى قازاقپارات ءتىلشىسى.

«اۋىل شارۋاشىلىعى سالاسىندا تاعى ءبىر وزەكتى ماسەلە - جۇمىسشىلاردىڭ تابىسى مەن سانىن جاسىرۋ فاكتىلەرى ورىن الىپ وتىر. ول ءوز كەزەگىندە ءوزىن-ءوزى قامتىعانداردىڭ سانىن ارتتىرادى. تالداۋ ناتيجەسىندە كىرىستەر دەپارتامەنتى مەن ستاتيستيكا دەپارتامەنتى اراسىندا اۋىتقۋلار بارى انىقتالدى. ستاتيستيكا بويىنشا 19931 شارۋا قوجالىق تىركەلسە، كىرىستەر دەپارتامەنتىندە – 19239، ايىرماشىلىق - 692 قوجالىق. بۇل ەڭ الدىمەن اۋىلدىق وكرۋگ اكىمدەرىنىڭ جەرگىلىكتى جەردە شارۋاشىلىق كىتابىن دۇرىس تولتىرمايتىنىن جانە جاڭارتپايتىنىن كورسەتەدى. بۇل ءوز كەزەگىندە ستاتيستيكانىڭ جالعان دەرەكتەرىنە اكەلەدى»، - دەيدى جەتىسۋ وبلىسى اكىمىنىڭ ورىنباسارى الىبەك جاقانبايەۆ.

وسىعان سايكەس، يەلىگىندە 100 گەكتاردان استام جەرى جانە اۋىلشارۋاشىلىق تەحنيكاسى بولا تۋرا جۇمىسشىلاردىڭ سانىن كورسەتپەيتىن 1226 قوجالىققا تالاپ قويىلدى.

ولار جالدامالى جۇمىسشىلاردى تىركەۋگە مىندەتتەلدى.

«بۇگىنگى كۇنى 194 شارۋاشىلىق 335 جۇمىسشىنى تىركەپ، دەكلاراتسيا تاپسىردى، ناتيجەسىندە جۇمىسشىلاردىڭ الەۋمەتتىك تولەمى قامتىلدى. زەينەتاقى قورىنا 11 ميلليون 368 مىڭ تەڭگە، مەديتسينالىق ساقتاندىرۋ مەن الەۋمەتتىك اۋدارىمعا 4 ميلليون تەڭگەدەن اۋدارىلعان»، دەدى الىبەك جاقانبايەۆ.

دەگەنمەن يەلىگىندە ايتارلىقتاي مال سانى جانە كولىگى بولا تۇرا جۇمىسشىلاردىڭ سانىن از كورسەتكەن شارۋاشىلىقتاردىڭ ءتىزىمى جاسالىپ، اۋداندارداعى كىرىستەر دەپارتامەنتىنىڭ بولىمشەلەرىنە جىبەرىلدى.