قىتايداعى سوعىس كەمەسىندە جۇمىس ىستەگەن قازاق بويجەتكەنى - شەتەلدەگى قازاق باسپا ءسوزى
شاندۇڭ سوعىس كەمەسىندە جۇمىس ىستەگەن قازاق بويجەتكەنى- «جەنمين جيباو»
«شاندۇڭ سوعىس كەمەسىندەگى اسكەري بويجەتكەن، قانداي ادەمى». اپتا سوڭىندا قىتايلىق باسىلىمداردا وسىنداي تاقىرىپتاعى اقپارات جارىق كوردى.
2017-جىلى 27- ءساۋىر كۇنى قىتايدىڭ العاشقى وتاندىق اسكەري اۆياماتكاسىندا (اسكەري ۇشاقتاردى ۇشىراتىن كەمە) شاندۇڭ سوعىس كەمەسى تەڭىزگە ءتۇسىرىلدى. اتالعان سوعىس كەمەسىندەگى العاشقى توپتاعى ايەل - گۇلزيرا ەسىمدى قازاق قىزى اسكەري رەتىندە كەمەنىڭ تۇڭعىش اسكەري جاتتىعۋىنا كۋا بولدى. كەيىننەن اسكەري مىندەتتەن بوساۋ الدىندا دا ول سوعىس كەمەسىنەن ۇشاقتاردىڭ ۇشقان ءساتىن ءوز كوزىمەن كورۋ باقىتىنا يە بولدى، دەپ حابارلايدى قىتايلىق «جەنمين جيباو» اقپاراتتىق پورتالى.
شىڭجاڭنان كەلگەن گۇلزيرا ەسىمدى قازاق قىزى - بيىل 24 جاستا. قازىر داليان ۇلتتار ۋنيۆەرسيتەتىندە وقيدى. گۇلزيرا 2019-جىلى ۋنيۆەرسيتەتتە وقىپ جۇرگەندە اسكەري مىندەتىن وتەۋ مارتەبەسىنە يە بولعان. ءسويتىپ، ول 2020-جىلى ماۋسىم ايىندا شاندۇڭ سوعىس كەمەسىنە كەلىپ، اتالعان كەمەدەگى العاشقى توپتاعى ايەل اسكەرلەردىڭ ءبىرى اتانادى.
سول جىلى شاندۇڭ سوعىس كەمەسى تۇڭعىش رەت شىنايى وقپەن اتىلعان جاتتىعۋىن جاساعان كەزدە گۇلزيرا اسەرلى ءساتتىڭ كۋاگەرى بولادى.
«الىپ سوعىس كەمەسىنە جاڭا عانا كەلگەن كەزدە اسكەري جاتتىعۋدى تىكەلەي كوزىممەن كورگەنىم ءۇشىن ءوزىمدى باقىتتى جاۋىنگەر سەزىنەمىن. كنوپكانى ءوز قولىممەن باسپاعانىممەن، سول ءساتتىڭ ءتىرى كۋاگەرى بولۋىم مەن ءۇشىن ەشقاشان ەستەن كەتپەس ءساتتىڭ ءبىرى بولدى»، - دەيدى ول.
قىتايلىق باسىلىمنىڭ دەرەگىنشە، ونىڭ اسكەردەگى جۇمىس ورنى كەمەنىڭ استىڭعى قاباتىندا بولعاندىقتان، ادەتتە تەك كەمەگە تيەلگەن ۇشاقتىڭ داۋىسىن عانا ەستيتىن. سوعىس ۇشاعىنىڭ ۇشىپ-قونعان كەزدەگى ءساتىن كۇندەلىكتى كورە المايتىن ەدى. گۇلزيرا اسكەري مىندەتىن اياقتاۋعا جاقىنداعان كەزدە، ءبىتىرۋشى جاۋىنگەر رەتىندە سوعىس كەمەسىندەگى ۇشاقتاردىڭ ۇشىپ- قونعانىن قايتادان كورگەن. بۇل قازاق قىزى ءۇشىن ەستە قالارلىق ساتتەردىڭ ءبىرى ەدى.
سوندىقتان گۇلزيرا وسى ءبىر قايتالانباس ساتتە قازاقتىڭ ۇلتتىق كيىمىن ارنايى كيىپ بارىپ، سوعىس كەمەسىنىڭ الاڭىندا ءوزىنىڭ اسكەري ساپتاعى ءومىرىنىڭ ەستەلىگى رەتىندە سۋرەتكە تۇسكەن. ايتا كەتەيىك، بۇل اقپاراتتا بەرىلگەن ۆيدەودا ول كەمە ۇستىندەگى الاڭدا ۇلتتىق كيىم كيىپ «قارا جورعا» بيىنە بيلەپ جۇرگەنىن بايقاۋعا بولادى.
«ول شاندۇڭ سوعىس كەمەسىندە مىندەت وتەگەنىن ماقتانىش تۇتادى جانە كوپتەگەن ستۋدەنتتەردىڭ دە ءوزى سەكىلدى اسكەري قوسىنعا بارۋىن تىلەيدى»، دەپ تۇيىندەيدى قىتايلىق ب ا ق.
قارا سابىنمەن شارۋاسىن شالقىتقان ءلاتيپا جاكەن قىزى - CNR
ءلاتيپا جاكەن قىزى ەسىمدى قازاق ايەلى قارا سابىن جاساۋ ارقىلى وتباسىلىق كىرىسىن ارتتىرىپ وتىر. ءلاتيپا 23 جاسىنان باستاپ قارا سابىن دايىنداۋدى ۇيرەنە باستايدى. العاشىندا تەك وتباسىنا قاجەتتىلىك ءۇشىن جاساعان.
«ول كەزدە قارا سابىندى جاساۋ ارقىلى ەكونوميكالىق كىرىس كوزىن اشۋعا بولاتىنىن ەشكىم ويلاپ كورمەگەن ەدى»، - دەپ جازادى قىتايدىڭ «ورتالىق حالىق راديوسى» اقپاراتتىق پورتالى.
اتالعان اقپارات كوزىنىڭ كەلتىرگەن دەرەگىنە سۇيەنسەك، ءلاتيپا جاكەن قىزى 2010-جىلى اۋىلىنان كيىم تىگۋ دۇكەنىن اشادى. كەيىننەن قارا سابىن جاساپ، ساتىپ قوسىمشا كىرىس كىرگىزۋدى قولعا الادى. ول قايناتىلعان ءبىر قازان تابيعي ماتەريالدان 12 قارا سابىن دايىنداۋعا بولاتىنىن، جىلىنا 500 دەن ارتىق قارا سابىن جاساپ، 20 مىڭ يۋان (1300000 تەڭگە كولەمىندە - اۆت.) كىرىس كىرگىزەتىنىن ايتادى.
ونىڭ ايتۋىنشا، قارا سابىن جاساۋ ونەرى اناسىنان وزىنە جالعاسقان ەكەن.
ادەتتە شەشەسى قىزىنا نەمەسە ەنەسى كەلىنىنە ۇيرەتىپ، مۇراعاتتايدى. ول كىشكەنتايىنان اجەسى مەن شەشەسىنىڭ قارا سابىن جاساعانىن كورىپ، كومەكتەسىپ وسكەن. ول ۋاقىتتا زاماننىڭ تاپشىلىق كەزەڭى بولعاندىقتان، بۇل ونەردى يگەرگەن اجەسى مەن شەشەسى ەشكىمنەن اقى الماي، قارا سابىندى تەگىن بەرگەن. ءلاتيپانىڭ ايتۋىنشا، بۇل - قازاقي بەرەكە مەن ىنتىماقتىڭ، ادامگەرشىلىكتىڭ بەلگىسى.
«زاماننىڭ دامۋىنا، ادامداردىڭ وزگەرۋىنە بايلانىستى قازىر وسى ونەردى بىلەتىندەر بارعان سايىن ازايىپ بارادى. قارا سابىن جاساۋ - ۇلتىمىزدىڭ ەجەلدەن كەلە جاتقان ءداستۇرلى ونەرىنىڭ ءبىر ءتۇرى. ونى ۇمىتۋىمىزعا بولمايدى. ەگەر قارا سابىندى جاساۋدى ۇيرەنۋگە قىزىعاتىندار بولسا، مەن ۇيرەتۋگە دايىنمىن»، - دەيدى ل. جاكەن قىزى.
ايتا كەتەيىك، قازاق حالقى قارا سابىندى الابوتا، سارىبالاق سەكىلدى دارىلىك وسىمدىكتەردىڭ كۇلىن پايدالانىپ، بەلگىلى مولشەردە مالدىڭ مايىن ارالاستىرىپ قايناتىپ جاسايدى. مۇنداي سابىننىڭ قىزامىقتى جازۋ، قايىزعاقتى كەتىرۋ، قىشىمانى باسۋ، بالالاردىڭ بورتپەسىن كەتىرۋ قاتارلى ەمدىك رولدەرى بار.
داستان ورازبەكوۆتىڭ جەكە كونسەرتى وتەدى - «Kaznews»
مامىر ايىنىڭ باسىندا قازاق ەلىنەن كوپشىلىككە بەلگىلى «وردا» توبىنىڭ ءانشىسى، اكتيور، ايگىلى «قازاقستان داۋىسى» شوۋىنىڭ تالىمگەرى داستان ورازبەكوۆ جەكە شىعارماشىلىق كونسەرتىن وتكىزبەكشى، دەپ حابارلايدى «Kaznews».
«كوپتەن كۇتكەن كەش ولگيي قالاسىندا مامىر ايىنىڭ 3-4-كۇندەرى قۇرمانحان اتىنداعى مۋزىكالىق دراما تەاترىندا ەكى رەت، ال مامىر ايىنىڭ 6-كۇنى ۇلانباتىر قالاسىندا زايسان حيلل سارايىندا ءبىر رەت وتەدى»، دەپ جازادى «Kaznews» .
موڭعوليالىق باسىلىمنىڭ دەرەگىنشە، داستان ورازبەكوۆ گاسترولدىك ساپارىندا ءوزىنىڭ تىڭدارماندارىنا كونتسەرت بەرىپ قانا قويماي، ەرەكشە سىي دايىنداپتى. اتاپ ايتساق، بايان-ولگي ايماعىندا وتەتىن كونتسەرتىندە جانكۇيەرلەرىمەن كەزدەسۋ ۇيىمداستىرماق. ءوزىنىڭ شىنايى فاناتتارىنىڭ لەبىزىن تىڭداپ، سىرلاسىپ ءارى بىرگە ءان ورىنداماق.
سونداي-اق، وسى اپتادا «Kaznews» اقپاراتتىق پورتالىندا «بايانولگيلىك جاس وسپىرىمدەر فۋتزالدان ەل بىرىنشىلىگىنە قاتىستى» دەگەن تاقىرىپتاعى اقپارات جارىق كوردى.
فۋتزالدان ەل بىرىنشىلىگىنە 11، 12 جاستاعى سپورتشى جاس وسپىرىمدەر قاتىسقان.
ءساۋىردىڭ 10-23- كۇندەرى ەل استاناسى ۇلانباتىر قالاسىندا فۋتزالدان «Grossroots» رەسپۋبليكالىق چەمپيونات ءوتتى. بۇل تۋرالى بايان-ولگي ايماعىنىڭ فۋتزال فەدەراتسياسىنىڭ جاتتىقتىرۋشىسى حاميت تويلات ۇلى حابارلاعان.
جارىسقا ەلدىڭ تۇكپىر- تۇكپىرىنەن 1400 دەن جوعارى سپورتشى قاتىسىپ شىن مىقتىنى انىقتادى. بايان-ولگي ايماعىنان 11 جانە 12 جاستاعى سپورتشىلار اتالعان دوداعا قاتىسىپ، ءوز ونەرلەرىن ورتاعا سالعان.
موڭعوليالىق باسىلىمنىڭ دەرەگىنشە، 11 جاستاعىلاردان 26 كوماندا، 12 جاستاعىلاردان 32 كوماندا جارىسقا قاتىستى.
«بايان-ولگي فۋتزال كومانداسى جاتتىقتىرۋشىسىنىڭ ايتۋى بويىنشا، الدى 6 اي، ارتى 2 اي عانا جاتتىققان جاس سپورتشىلار بولسا دا ەلدىڭ تاريحى تەرەڭ ازۋلى كلۋبتارىنا قارسى كەرەمەت ونەر كورسەتكەن»، دەپ جازدى «Kaznews».
سياندا قىتاي مەن ورتالىق ازيا سىرتقى ىستەر مينيسترلەرىنىڭ ءتورتىنشى كەزدەسۋى ءوتتى - People.cn
قىتاي مەن ورتالىق ازيا سىرتقى ىستەر مينيسترلەرىنىڭ ءتورتىنشى كەزدەسۋى 27- ءساۋىر كۇنى تاڭەرتەڭ شەنسي ولكەسىنىڭ سيان قالاسىندا ءوتتى، دەپ حابارلايدى قىتايدىڭ «People.cn» اقپاراتتىق پورتالى.
قىتايلىق ب ا ق- تىڭ مالىمەتىنشە، 2022-جىلدىڭ ماۋسىمىندا قىتاي مەن ورتالىق ازيا سىرتقى ىستەر مينيسترلەرىنىڭ ءۇشىنشى كەزدەسۋى بارىسىندا بارلىق تاراپ قىتاي جانە ورتالىق ازيا مەملەكەتتەرى باسشىلارىنىڭ كەزدەسۋ تەتىگىن قۇرۋعا كەلىسكەن بولاتىن.
قاتىسۋشى ەلدەر الداعى قىتايدا وتەتىن ءسامميتتى ۇيىمداستىرۋ، قىتاي مەن ورتالىق ازيانىڭ ءتۇرلى سالالارىنداعى ىنتىماقتاستىق، سونداي-اق ورتاق نازار اۋداراتىن حالىقارالىق جانە وڭىرلىك ماسەلەلەر بويىنشا پىكىر الماسقان.
«كەزدەسۋدەن كەيىن قىتايدىڭ سىرتقى ىستەر ءمينيسترى تسين گان تاراپتار كەلەسى ايدا سيان قالاسىندا قىتاي-ورتالىق ازيا ءسامميتىن وتكىزۋگە كەلىستى دەپ مالىمدەدى»، دەپ جازدى قىتايلىق ب ا ق.
تۇركيا-قازاقستان دوستىق ساياباعى اشىلدى- «TRT»
انادولىنىڭ باس قالاسى انكارانىڭ ماماك اۋدانىندا تۇركيا-قازاقستان دوستىق ساياباعى قىزمەتكە بەرىلدى.
ساياباقتىڭ اشىلۋ سالتاناتىنا قازاقستان رەسپۋبليكاسى پارلامەنتى ءماجىلىسىنىڭ ءتوراعاسى ەرلان قوشانوۆ پەن تۇركيا ۇلى ۇلتتىق ءماجىلىسىنىڭ ءتوراعاسى مۇستافا شەنتوپ قاتىستى. سونىمەن بىرگە قازاقستاننان كەلگەن ونەر توبى، قازاقستاندىق ستۋدەنتتەر، اۋداننىڭ جۇرتشلىعى دا كەلدى.
بۇل تۋرالى وسى اپتادا تۇركيا راديو تەلەۆيزيا پورتالى دا حابارلاعان بولاتىن.
تۇركيالىق ب ا ق- تىڭ دەرەگىنشە، ەكى ەلدىڭ دوستىعى مەن باۋىرلاستىعىنىڭ بەلگىسى بولاتىن ساياباق 14 مىڭ شارشى مەتر الاڭدى قۇرايدى. جاسىل جەلكەن الاڭدا جۇگىرۋ جانە ۆەلوسيپەد جولدارى، ارنايى جاتتىعۋ الاڭدارى، بالالار ويىن الاڭى ورنالاسقان. 16 تۇركى مەملەكەتىنىڭ سانىنا وراي ارناۋلى 16 سامالجاي ويلاستىرىلعان. شاتىرلارى بايراعىمىزبەن تۇستەس بويالعان. ساياباق اۋماعىندا كۇلتەگىن- تونىكوك ەسكەرتكىشتەرى، حاكىم اباي مەن ۇلى فيلوسوف ءال-ءفارابيدىڭ دە ءبيۋستى ورىن العان.
سونداي-اق، وسى اپتادا «TRT» - دا «يبراحيم كۇلشىمبايەۆ «ەرلىگى ءۇشىن» مەدالىمەن ماراپاتتالدى» دەگەن تاقىرىپتاعى اقپارات جارىق كوردى.
تۇركيالىق باسىلىمنىڭ دەرەگىنشە، قازاقستان توتەنشە جاعدايلار ءمينيسترىنىڭ ءبىرىنشى ورىنباسارى يبراحيم كۇلشىمبايەۆ «ەرلىگى ءۇشىن» مەملەكەتتىك مەدالىمەن ماراپاتتالدى. اتالعان سىيلىقتى تۇركيا پرەزيدەنتى رەجەپ تايىپ ەردوعان پرەزيدەنتتىك سارايدا وتكەن سالتاناتتى جيىندا تابىس ەتكەن.
ايتا كەتەيىك، تۇركيا پرەزيدەنتتىك سارايىندا 2023-جىلدىڭ 6- اقپانىندا تۇركيادا بولعان جويقىن جەر سىلكىنىسىندە ىزدەۋ-قۇتقارۋ جۇمىستارىنا قاتىسقان ازاماتتاردى ماراپاتتاۋ ءراسىمى ءوتتى. سالتاناتتى شاراعا 80 نەن استام ەلدەن كەلگەن وكىلدەر قاتىسقان.
يران مەن قازاقستان اراسىنداعى تاۋار اينالىمى 20 پايىزعا ءوستى - «Parstoday»
يراننىڭ كەدەندىك ستاتيستيكاسى يران مەن قازاقستان اراسىنداعى تاۋار اينالىمىنىڭ 20 پايىزعا وسكەنىن كورسەتەدى. يران مەن قازاقستان اراسىنداعى ساۋدا وتكەن جىلى 320 ميلليون دوللاردان استى، بۇل وتكەن جىلمەن سالىستىرعاندا 20 پايىزعا جوعارى، دەپ حابارلايدى «Parstoday» اقپارات اگەنتتىگى.
يراندىق ب ا ق- تىڭ دەرەگى بويىنشا، بيىلعى جىلى قازاقستاننان يرانعا شامامەن 124 ميلليون 801 مىڭ دوللاردى قۇراعان 275 مىڭ توننادان استام تاۋار اكەلىنىپ، وتكەن جىلمەن سالىستىرعاندا قۇنى 59 پايىزعا، سالماعى بويىنشا 25 پايىزعا ارتقان.
ايتا كەتۋ كەرەك، ءبيداي، ارپا، جارتىلاي تىركەمەلەرگە ارنالعان جول تراكتورلارى، كۇنباعىس مايى مەن ماقسارى مايى، تەك سىعىمدالاتىن پورشەندى قوزعالتقىشى بار تراكتورلار(ديزەل نەمەسە جارتىلاي ديزەل) قازاقستاننان يرانعا اكەلىنەتىن نەگىزگى تاۋارلار بولدى.
ازيز ابدۋحاكيموۆ قازاقستاننىڭ ەكولوگيا جانە تابيعي رەسۋرستار مينيسترىمەن كەزدەستى - «ءو ز ا»
27- ساۋىردە تابيعي رەسۋرستار ءمينيسترى ازيز ابدۋحاكيموۆ پەن قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆانىڭ كەزدەسۋى ءوتتى.
بۇل تۋرالى اپتا سوڭىندا «ءو ز ا» اقپاراتتىق اگەنتتىگى حابارلادى.
وزبەكستاندىق باسىلىمنىڭ مالىمەتىنشە، كەزدەسۋدە قورشاعان ورتانىڭ مونيتورينگى، بيولوگيالىق ارتۇرلىلىك پەن تابيعي اۋماقتاردى قورعاۋ، كليماتتىڭ وزگەرۋىنىڭ سالدارىن ازايتۋ، قاتتى تۇرمىستىق قالدىقتاردى باسقارۋ، كادرلىق الەۋەتتى ارتتىرۋ مەن عىلىمي-تەحنيكالىق سالالارداعى ىنتىماقتاستىق ماسەلەلەرى تالقىلانعان.
ايتا كەتەيىك، 2022 -جىلدىڭ جەلتوقسانىندا وزبەكستان رەسپۋبليكاسىنىڭ ۇكىمەتى مەن قازاقستان رەسپۋبليكاسىنىڭ ۇكىمەتى اراسىندا قورشاعان ورتانى قورعاۋ تۋرالى كەلىسىمگە قول قويىلعان. كەلىسسوزدەر بارىسىندا اتالعان كەلىسىم اياسىندا ءتۇرلى باعىتتاعى ىنتىماقتاستىقتى تەرەڭدەتۋ جانە كەڭەيتۋ تۋرالى كەلىسىمدەرگە قول جەتكىزىلدى.
اۆتور: بەيسەن سۇلتان