كەلەستە مەكتەپ مۇعالىمدەرى وقۋشىنىڭ ورنىنا تەست تاپسىرىپ بەرگەن
مۇنداي فاكتىنى وبلىستىق ءبىلىم سالاسىندا ساپانى قامتاماسىز ەتۋ دەپارتامەنتىنىڭ قىزمەتكەرلەرى انىقتادى.
دەپارتامەنت باسشىسى عالىمجان الماتوۆتىڭ مالىمەتىنشە، وقيعا «بولاشاق» اتىنداعى №43-جالپى ورتا مەكتەپتە بولعان.
سالا جاۋاپتىلارى مەملەكەتتىك اتتەستاتتاۋعا باقىلاۋشى رەتىندە قاتىسۋ بارىسىندا اجەتحاناعا سۇرانىپ شىققان وقۋشىنىڭ تاپسىرمالارىن كومپيۋتەرىندەگى پارولى ارقىلى قاشىقتان باسقارىلعانىن انىقتاعان. ونىڭ ۆيدەوسى دا پايدا بولدى. بەينەجازبادان 13 شى سۇراق بەلگىلەنبەگەن قالپىندا جانە قىزىل بەلگىنى كورسەتىپ تۇرعانىن بايقاۋعا بولادى. الايدا وقۋشى پارول، لوگينىمەن قايتا كىرسە، بۇل سۇراقتىڭ جاۋابى بەلگىلەنگەن.
اتالعان وقيعا بويىنشا مەكتەپ ديرەكتورىنا سوگىس تۇرىندەگى تارتىپتىك جازا قولدانىلدى.
ال ارىس قالاسىنداعى ب. مومىش ۇلى اتىنداعى №11-مەكتەپتە وقۋشىلاردىڭ ءبىلىم دەڭگەيىن تەستىلەۋ كەزىندە 9 «B» سىنىپ وقۋشىسىنان ۇيالى تەلەفون تابىلعان. تىيىم سالىنعان زاتتاردى انىقتاۋ اكتىسى جاسالىپ، تەست تاپسىرۋشى اۋديتوريادان شىعارىلعان. بۇل جاعدايعا قاتىستى دا اتالعان ءبىلىم ۇياسىنىڭ ديرەكتورىنىڭ مىندەتىن اتقارۋشىعا سوگىس بەرىلدى.