قاسىم-جومارت توقايەۆ «اسسامبلەيانىڭ قاجەتى جوق» دەگەن پايىمدارعا پىكىر ءبىلدىردى
«ءار ازامات بىرلىكتى نىعايتۋ ءۇشىن قىزمەت ەتۋى كەرەك. بۇل قىزمەت ەشقاشان توقتامايدى، ۇزدىكسىز جالعاسا بەرەدى. ويتكەنى بىرلىك بولسا عانا، تىرلىك بولادى. ءبىز وسى مىزعىماس قاعيداعا ءاردايىم ادال بولۋىمىز كەرەك. تاتۋلىق پەن كەلىسىمنىڭ ەرەكشە ماڭىزدى ەكەنىن جۇرتتىڭ ءبارى بىردەي سەزىنبەۋى مۇمكىن. سول سەبەپتى كەيدە «اسسامبلەيانىڭ قاجەتى جوق» دەگەن ۇشقارى، ياعني كۇماندى پىكىرلەر ايتىلىپ جاتادى. شىن مانىندە، اسسامبلەيا - مەملەكەتتىلىگىمىزدىڭ ىرگەسىن بەكىتىپ تۇرعان باستى ينستيتۋت»، - دەدى پرەزيدەنت.
مەملەكەت باسشىسى قازاقستان حالقى اسسامبلەياسى - بىرلىگىمىزدى نىعايتۋعا قىزمەت ەتەتىن بىرەگەي قۇرىلىم ەكەنىن اتاپ ءوتتى.
«اسسامبلەيا قاسيەتتى قازاق جەرىن مەكەن ەتكەن بارشا ەتنوستى ۇيىستىرىپ وتىر. وندا ەڭبەك ەتىپ جۇرگەن ازاماتتاردى بىرلىكتىڭ ەلشىسى دەۋگە بولادى»، - دەدى قاسىم-جومارت توقايەۆ.
ايتا كەتەيىك، پرەزيدەنت قاسىم-جومارت توقايەۆتىڭ قاتىسۋىمەن قازاقستان حالقى اسسامبلەياسىنىڭ XXXII سەسسياسى ءوتىپ جاتىر.