دارحان قىدىرالى «ۇلت قۇرۋ» تەرمينى تۋرالى: مەن «قازاق» دەگەنگە توقتايمىن
«ول - قالىپتاسقان عىلىمي تەرمين. ۇلت قۇرۋ دەگەن مۇمكىن قازاقشادا دۇرىس ەستىلمەگەن شىعار. قازاقشاعا اۋدارىلعاندا كالكا بولعان شىعار. ءبىراق بۇل - عىلىمي تەرمين. جالپى ەتنوس دەگەن ۇعىم بار، ۇلت دەگەن ۇعىم بار. مەن كەشەگى سەسسيانىڭ ەكىنشى وتىرىسىنا قاتىسقان جوقپىن. ءبىراق وعان بايلانىستى جاقسى پىكىرلەر دە ايتىلدى. ارينە، ەل بولعاننان كەيىن سىن دا ايتىلادى. ءبىز جاقىن ارادا «كوزقاراس» كلۋبىندا وسى ماسەلەنى كەڭىرەك تالقىلايمىز، ساراپشىلاردى شاقىرامىز. جالپى ۇلت قۇرۋدىڭ الەمدە قالىپتاسقان ۇعىمدارىن تالقىلايمىز. نەگىزى ونداي ماسەلەلەر عىلىمي تۇرعىدا تالقىلانۋى كەرەك. ۇلت قۇرۋدىڭ ءتۇرلى كومپونەنتتەرى بار. سوندىقتان ءبىز بۇل ماسەلەگە عىلىمي نەگىزدە قاراۋىمىز كەرەك. بۇل تاقىرىپ كىمنىڭ يدەياسى ەكەنىن ايتا المايمىن. تاعى دا ايتا الام، ەكىنشى سەسسياعا قاتىسقان جوقپىن. ءبىراق ونى اقپارات قۇرالدارى ارقىلى ءبىلدىم. ورىسشاسى «ناتسستروي» دەگەن تەرمين. اعىلشىن تىلىندە بۇل تۋرالى كوپتەگەن كىتاپتار، زەرتتەۋلەر بار»، - دەدى ۆەدومستۆو باسشىسى.
ب ا ق وكىلدەرى مينيستردەن قازاقستان ازاماتتارىنىڭ ءتولقۇجاتىنا ۇلتى قالاي دەپ كورسەتىلگەنى دۇرىس دەپ ەسەپتەيتىنىن سۇرادى.
«مەن جالپى «قازاق» دەگەنگە توقتايمىن. ويتكەنى ءبىزدىڭ ءبارىمىزدى قازاق دەپ قابىلدايدى. ۆينوكۋروۆتى دا، گولوۆكيندى دە، رىباكينانى دا شەتەلدە قازاق سپورتشىسى دەپ قابىلدايدى. مۇنىڭ بارىنە عىلىمي تۇرعىدا كەلۋىمىز كەرەك. ءتولقۇجاتتا بۇكىل ۇلتتار قازاق بولۋى كەرەك دەپ ەشكىم ايتىپ جاتقان جوق. قازىر پرەزيدەنت قانداي ماسەلەلەر قوزعايتىنىن تىڭدايىق. قازاقشا دۇرىس اۋدارىلماسا، ونى عالىمداردان سۇراۋ كەرەك. جالپى بۇل كەز كەلگەن وركەنيەتتى ەلدە كەڭىنەن تالقىلاناتىن ۇعىم»، - دەدى دارحان قىدىرالى.
ايتا كەتەيىك، پرەزيدەنت قاسىم- جومارت توقايەۆتىڭ قاتىسۋىمەن قازاقستان حالقى اسسامبلەياسىنىڭ سەسسياسى ءوتىپ جاتىر.