پرەزيدەنت تەلەراديوكەشەنى يراندىق ارىپتەستەرىمەن ىنتىماقتاستىقتى دامىتۋدا
تاراپتار بۇقارالىق اقپارات قۇرالدارىنىڭ ءوزارا ءىس-قيمىلىن ارتتىرۋ، كونتەنت الماسۋ جانە بىرلەسكەن جوبالاردى ىسكە قوسۋ ماسەلەلەرىن تالقىلادى. قوس مەملەكەت قارىم-قاتىناسىنداعى مادەني بايلانىستاردىڭ ماڭىزدى ءرولى دە ەرەكشە اتاپ ءوتىلدى.
پرەزيدەنت تەلەراديوكەشەنىنىڭ باس ديرەكتورى راۋشان قاجىبايەۆانىڭ ايتۋىنشا، مادەني بايلانىستار ءداستۇرلى تۇردە حالىقتار مەن ەلدەر اراسىنداعى مىزعىماس، دوستىق قارىم-قاتىناستى دامىتۋدىڭ بەرىك نەگىزى بولادى.
«مەدياسالاداعى ىنتىماقتاستىق تا وسىعان سەپتىگىن تيگىزەدى. جاڭالىقتاردى، جوبالاردى ءبولىسۋ جانە ولاردى بىرلەسىپ ءوندىرۋ تاجىريبە الماسۋعا عانا ەمەس، ەڭ الدىمەن، ەلدەرىمىزدى جاقىنداتۋعا مۇمكىندىك بەرەدى»، - دەدى راۋشان قاجىبايەۆا.
ءوز كەزەگىندە، يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ءالي اكبار دجوۋكار قازاقستاندىق جانە يراندىق مەدياكومپانيالار اراسىندا ءونىمدى ىنتىماقتاستىقتى جولعا قويۋدىڭ ماڭىزدى ەكەنىن اتاپ ءوتتى.
«بۇگىنگى كەزدەسۋ - قازاقستان مەن يران تەلەراديوكەشەندەرىنىڭ ىنتىماقتاستىعى جولىنداعى ماڭىزدى قادام جانە «قازاقپارات» پەن «IRNA»اگەنتتىكتەرىنىڭ بىرلەسكەن جۇمىسىنا جاڭا سەرپىن بەرەدى»، - دەيدى ءالي اكبار دجوۋكار.
ديپلوماتيالىق ميسسيا باسشىسى «Jibek Joly» جانە «Silk Way» تەلەارنالارىنىڭ ورتالىق ازياداعى ەڭ زاماناۋي روبوتتاندىرىلعان ستۋدياسىنا بارىپ، جەتەكشى قازاقستاندىق ب ا ق- تىڭ تەحنيكالىق جاراقتاندىرۋ دەڭگەيى الەمدىك وزىق ستاندارتتارعا ساي كەلەتىنىن جەتكىزدى.
كەزدەسۋ قورىتىندىسى بويىنشا تاراپتار قازاقستان رەسپۋبليكاسى پرەزيدەنتىنىڭ تەلەراديوكەشەنى مەن يران يسلام رەسپۋبليكاسىنىڭ مەدياۇيىمدارى اراسىنداعى ەكىجاقتى قاتىناستاردى دامىتۋدىڭ كەشەندى جول كارتاسىنا قول قويۋعا دايىن ەكەندەرىن ءبىلدىردى.
ايتا كەتەيىك، ق ر پرەزيدەنتىنىڭ تەلەراديوكەشەنى - قازاقستاننىڭ ءىرى مەدياكومپانياسى، ونىڭ قۇرامىنا: «Jibek Joly» رەسپۋبليكالىق تەلەارناسى، «Silk Way» حالىقارالىق تەلەارناسى، «قازاقپارات» حالىقارالىق اقپارات اگەنتتىگى جانە دەرەكتى كينو ورتالىعى كىرەدى.