باعدات مۋسين بالالارعا ارنالعان كارتا ەنگىزۋ تۋرالى ايتتى

استانا. قازاقپارات - تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين بالالاردى قاۋىپسىز ينتەرنەتپەن قامتۋ جوسپارىمەن ءبولىستى، دەپ حابارلايدى قازاقپارات ءتىلشىسى.

«بالالاردى قاۋىپسىز ينتەرنەتپەن قامتۋدىڭ ءارتۇرلى نۇسقاسى بار. ءبىز ولاردى زەرتتەيمىز. قاۋىپسىز ينتەرنەت دەگەنىمىز بالالارعا قاجەت ەمەس دەرەك كوزدەرى مەن سايتتاردى بۇعاتتاپ، كەرەگىن عانا قالدىرۋ. ءبىز باعىتتا جوسپارىمىز بار. تاريف ۇيالى بايلانىس وپەراتورلارى ارقىلى جۇزەگە اسىرىلادى»، - دەدى باعدار مۋسين ۇكىمەت وتىرىسىنان كەيىن تىلشىلەردىڭ ساۋالىنا جاۋاپ بەرە وتىرىپ.

ونىڭ ايتۋىنشا، بۇگىندە ءتۇرلى ءموبيلدى تاريفتىك جوسپارلار بار، دەگەنمەن جاڭا ءارى تيىمدەر تاريف ارتىق ەتپەيدى.

ەسكە سالا كەتسەك، وسىدان بىرەر كۇن بۇرىن وقۋ- اعارتۋ مينيسترلىگى بالالارعا ارنالعان SIM- كارتا ەنگىزۋ تۋرالى ۇسىنىس تاستاعان ەدى.

«ءبىز بابالارعا ارنالعان SIM كارتا ۇسىنىپ وتىرمىز. بالالارعا ارنالعان جەكە SIM كارتا كەرەك. ول اتا- انالاردىڭ باقىلاۋىندا بولادى. بالا سول SIM كارتا ارقىلى ينتەرنەتكە قوسىلسا، مىندەتتى تۇردە اتا- انالاردىڭ رۇقساتى سۇرالادى. ءبىز وسىنداي جۇيەنى ەنگىزۋدى ۇسىنىپ وتىرمىز. بۇل بالانىڭ ينتەرنەتتە قانداي سايتقا كىرگەنىن، قانداي الەۋمەتتىك جەلىدە وتىرعانىن باقىلاۋعا مۇمكىندىك بەرەدى. تاعى ءبىر ماسەلە، ول كارتا ارقىلى بالانىڭ ينتەرنەتكە كىرەتىن ۋاقىتىن شەكتەي الامىز. كەيدە بالا ءتۇن ورتاسىندا ينتەرنەتتە وتىراتىن جايتتار بولادى»، - دەگەن ەدى وقۋ- اعارتۋ ۆيتسە- ءمينيسترى ەدىل وسپان.