قازاقستان پرەمەر-ءمينيسترى يرانعا بارادى
22:11, 24 - ءساۋىر 2023
استانا. قازاقپارات - 2023-جىلعى 26- ساۋىردە قازاقستان پرەمەر-ءمينيسترى ءاليحان سمايىلوۆتىڭ يران يسلام رەسپۋبليكاسىنا ساپارى وتەدى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
بۇل ساپار يران جاعىنىڭ شاقىرۋى نەگىزىندە ۇيىمداستىرىلماق.
«ساپار باعدارلاماسىنا سايكەس، يران پرەزيدەنتى يبراحيم رايسيمەن جانە يراننىڭ ءبىرىنشى ۆيتسە-پرەزيدەنتى موحامماد موحبەرمەن كەزدەسۋلەر جوسپارلانعان»، - دەدى ا. سمادياروۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، ساپار اياسىندا يران يسلام رەسپۋبليكاسىنا قازاقستاننىڭ ساۋدا-ەكونوميكالىق ميسسياسى ۇيىمداستىرىلادى. سونىمەن قاتار ءبىرقاتار ۆەدومستۆوارالىق مەموراندۋم مەن بيزنەس كەلىسىمشارتتارعا قول قويىلماق.