وڭتۇستىك كورەيا شەكاراسىنان زاڭسىز وتكەن ەكى قازاقستاندىقتى الدا نە كۇتىپ تۇر؟
20:59, 24 - ءساۋىر 2023
استانا. قازاقپارات - سىرتقى ىستەر مينيسترلىگى وكىلى وڭتۇستىك كورەيا شەكاراسىنان زاڭسىز وتپەك بولعان قازاقستاندىقتاردىڭ جاعدايى تۋرالى ايتتى، - دەپ حابارلايدى Massaget.kz ءتىلشىسى.
س ءى م رەسمي وكىلى ايبەك سمادياروۆ وڭتۇستىك كورەياداعى كونسۋل قازاقستاندىقتارمەن كەزدەسكەنىن مالىمدەدى.
«كونسۋل ولارمەن كەزدەستى، ولاردىڭ جاعدايى جاقسى، شاعىمدارى جوق. پروكۋراتۋرا ءىستى سوتقا بەردى، ءبىرىنشى تىڭدالىم مامىردىڭ ورتاسىندا وتەدى. ولاردىڭ ادۆوكاتى - مەملەكەتتىك ادۆوكات، تۋىستارىمەن بايلانىستامىز»، - دەدى ايبەك سمادياروۆ.
ەسكە سالايىق، بۇعان دەيىن ەكى قازاقستاندىق وڭتۇستىك كورەيا شەكاراسىن زاڭسىز وتپەك بولعانى حابارلانعان بولاتىن. ولار وڭتۇستىك كورەياعا بيىل 24- ناۋرىزدا تاشكەنتتەن بارعان. كەيىن ولاردىڭ تۋىسقاندارى وقيعانىڭ ءمان-جايىن ايتىپ، سۇحبات بەردى.