قازاقستان ارقىلى رەسەي استىعىن وزبەكستانعا ەكسپورتتاعاندار ۇستالدى

قوستاناي. قازاقپارات - قازاقستان ارقىلى رەسەي استىعىن وزبەكستانعا ەكسپورتتاعان ادامدار توبى ۇستالدى، دەپ حابارلايدى قازاقپارات قارجىلىق مونيتورينگ اگەنتتىگىنە سىلتەمە جاساپ.

«ق م ا قوستاناي وبلىسى بويىنشا دەپارتامەنتىنىڭ قىزمەتكەرلەرى ەلگە كىرگىزىلگەن استىق كولەمىن تومەندەتىپ، رەسەيدەن اۆتوموبيل كولىگىمەن استىقتىڭ «سۇر» يمپورتىمەن اينالىساتىن ادامدار توبىنىڭ قىلمىستىق ارەكەتىن اشكەرەلەدى.

اتالعان تۇلعالار 2021-2022-جىلدار كەزەڭىندە وزبەكستان رەسپۋبليكاسىنا 500 ميلليون تەڭگەدەن استام سوماعا 4,8 مىڭ توننا كولەمىندە رەسەي استىعىن ەكسپورتتاعان. بۇل رەتتە، اتالعان استىقتى ەكسپورتتاۋ كەزىندە حالىقارالىق ترانزيتتىك تاريفتى تولەۋدەن جالتارۋ ماقساتىندا ول قازاقستاندىق تاۋار رەتىندە كورسەتىلگەن. بۇعان وتاندىق شارۋا قوجالىقتارىنىڭ جالعان شوت-فاكتۋرالارى پايدالانىلعان جانە بۇل 88 ميلليون تەڭگە مولشەرىندە ترانزيتتىك تاريفتەن جالتارۋعا مۇمكىندىك بەرگەن. سوتقا دەيىنگى تەرگەۋ جالعاسۋدا»، - دەلىنگەن اگەنتتىك حابارلاماسىندا.

ايتا كەتەيىك، ق ر كونستيتۋتسياسىنىڭ 77-بابى 3-تارماعىنىڭ 1-تارماقشاسىنا جانە ق ر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس، ءار ادام سوت ۇكىمى زاڭدى كۇشىنە ەنگەنگە دەيىن قىلمىستىق قۇقىق بۇزۋشىلىق جاساۋدا كىناسىز دەپ ەسەپتەلەدى.