پاسحا كەزىندە ءدىني جازبالاردى نە سەبەپتى قازاقشا عيبادات ەتكەنىن ايتتى
جەلىدە پىكىر جازۋشىلاردىڭ ءبىرى بۇل باستامانى قولداسا، ەندى ءبىرى مۇنى ۋاعىز دەپ باعالاعان. يەروموناح ياكوۆتىڭ (ۆورونسوۆ) ايتۋىنشا، بۇل ۋاعىز ەمەس. ول تەك اقتوبەدە وتكەن پاسحا راسىمىندە ىنجىلدەگى بىرنەشە ولەڭدى قازاقشاعا وقىعان.
بۇل ەشقانداي جاڭالىق ەمەس. پاسحا كەزىندە ءدىني جازبالاردى ءارتۇرلى تىلدە وقۋ ءداستۇرى بۇرىننان بار. بۇعان دەيىن گرەك، لاتىن جانە ەۋروپالىق تىلدەر قولدانىلعان. ال سوڭعى جىلدارى ءىنجىل تاراۋلارىن قازاق تىلىندە وقۋ دا قولدانىلىپ كەلەدى، - دەيدى يەروموناح.
ايتۋىنشا، ول سوڭعى كەزدە قازاق ءتىلىن ۇيرەنىپ، ونى ءوزىنىڭ ءدىني قىزمەتىندە قولدانىپ ءجۇر.
مەن اقتوبە ەپيسكوپى يگناتيگە پاسحا مەرەكەسىنە وراي ەۆانگەليەنى قازاق تىلىندە وقۋدى ۇسىندىم، ول رۇقساتىن بەردى. ءيا، مەن شىركەۋدە قازاق ءتىلىنىڭ ءۇنى شىققانىن قالايمىن. سەبەبى بىزگە كەلەتىن قاۋىمنىڭ اراسىندا دا، ءدىني قىزمەتكەرلەر ىشىندە دە قازاقتار بار. ال شىركەۋگە كەلەتىن وزگە ادامدار قازاق ءتىلىن ەستىپ، ۇيرەنە بەرۋى ءتيىس، - دەپ ءتۇسىندىردى يەروموناح ياكوۆ.
بۇل جاعدايعا قاتىستى ەلىمىزدىڭ پراۆوسلاۆيە شىركەۋىنىڭ، استانا جانە قازاقستان ەپارحياسىنىڭ باسپا ءسوز حاتشىسى ەۆگەنيي يۆانوۆ تا پىكىر ءبىلدىردى.
پراۆوسلاۆيەلىك عيبادات ارنايى سلاۆيان تىلىندە جۇرگىزىلەدى، بۇل مىزعىماس ەرەجە. سوندىقتان شىركەۋدەگى قىزمەتتىڭ ءبارى قازاقشا بولادى دەگەن ءسوز جوق. الايدا عيبادات جاساۋدىڭ كەي ەلەمەنتتەرىنە قازاق ءتىلىن دە قوسۋعا بولادى، مەنىڭشە، بۇل كەرەمەت. ال ەندى ۋاعىز ايتۋعا توقتالساق. مۇندا جاعدايدى وبەكتيۆتى ءارى جەكە قاراۋ كەرەك. ەگەر شىركەۋگە كەلگەندەردىڭ كوبى قازاق بولىپ، ۋاعىزدى انا تىلىندە تىڭداعىسى كەلسە، وندا بۇل مۇمكىن.
ماسەلەن ءبىز جاقىندا ءدىني كىتاپتاردى قازاق تىلىنە اۋداردىق. مۇنى ۋاعىز ەمەس، اعارتۋشىلىق دەپ ءتۇسىنۋ قاجەت. وسىلايشا قازاق ءتىلدى ادامدار وزدەرىنىڭ پراۆوسلاۆيەلىك وتانداستارىنىڭ سەنىمى تۋرالى ءبىلىپ، تانىسا الادى. بۇل قازاقستان حالىقتارى اراسىنداعى ءوزارا تۇسىنىستىكتى، قۇرمەت پەن دوستىقتى نىعايتۋ ءۇشىن دە وتە پايدالى بولار ەدى، - دەدى ەۆگەني يۆانوۆ.